«Naguamos por una música que salga del públicu folkie»

Ir al guieldu ye una espresión emplegada en dellos conceyos del centru-occidente pa referise a la xera de pañar frutos menudos del monte o la mar. Nella atoparon el nome pa la so banda siete rapazos y rapaces procedentes de tolos cabos d'Asturies -tamién de Llión- enfotaos en facer música celta, asina con toles lletres y ensin nengún envís a los discutinios que pueda entamar inda esa etiqueta. 'L'Aremu' ye'l so primer sencillu difundíu na plataforma spotify, dos temes, ún inspiráu en sones de la tradición asturiana y l'otru na irlandesa, toa una declaración d'intenciones de lo qu'allampien seya'l so repertoriu, un llabor nel qu'escomenzaron a trabayar desque se xuntaron, después de contactase al traviés de les redes sociales en 2019. Los soníos de nomes como los de los bretones Alan Stivell y Dan ar Braz o los escoceses Capercaillie nos 70-80 son referencies pa esti conxuntu lideráu pol multinstrumentista avilesín Héctor Aneiros que reivindica la identidá 'revival' de la so apuesta.

«Dende que yera un rapaz sentíme atraíu por esi tipu de música, cuento que desque asistí a un conciertu de Carlos Núñez en A Coruña tuvi l'encamientu de poder formar un grupu. Más que lo netamente tradicional, siempre me prestó esi soníu celta o atlánticu que se espurre hacia el folk-rock o la new age. Perende ye onde queremos dir nós», desplica Aneiros. El raigón asturianu ta presente nel trabayu d'estos músicos pero, talo matiza'l compositor de los sos temes: «Nun buscamos recrear o rescatar sones a la manera que puedan facer grupos como Tuenda, por poner un exemplu significativu, esa tradición tenémosla como una base, sicasí nun ye la única y el nuestru propósitu ye tocar pieces nueves abiertes a un universu más ampliu como'l que se aveza nomar 'world music' y con instrumentaciones dalgo distintes a les que tamos acostumaos a sentir nel folk astur: sintetizadores, baxu, etc. De fechu caún de los componentes del grupu vien d'escenes estremaes, de la música clásica al death metal o el country», detalla.

Amás d'Aneiros nes flautes, whistles y ocarines, formen Guieldu Susana Sors (voz y guitarra acústica), Celia Nieto (violín), Jorge Álvarez (bouzuki), Laura Méndez (teclaos y sintetizadores), Pablo Santamarta (baxu) y Gabriel Catalán (batería). Los cortes qu'igüen el so primer single grabáronse nel estudiu domésticu del técnicu de soníu Adrián Fernández, responsable tamién de la mestura y masterización del material. Dende'l so llanzamientu l'acoyida que ta teniendo 'L'Aremu' afala a la banda a siguir el so camín: «Nes plataformes ta algamando bastantes escuches si tenemos en cuenta que ye lo primero que se conoz de nós y lo que nos llega ye una recepción mui positiva, ta gustando. El nuestru deséu ye dir ufiertando más alantre otros temes nuevos nel mesmu formatu, como los antiguos senciellos con cara A y cara B. Dirémos llanzándolos asina hasta rematalo xuntándolos nun trabayu que recueya el repertoriu que fuimos componiendo», revela Aneiros.

El directu ye'l so retu más inmediatu, agora qu'escomienza escamplar el panorama nublu enriba los escenarios que supunxo la pandemia. Ye lo que más ganes tenemos de facer, poder tocar toos esos temes nos que trabayamos en vivu, seya en festivales, non necesariamente de música celta o tradicional, de cualaquier ámbitu y prestábanos muncho tamién poder facelo en fiestes populares. Nos conciertos, lo mesmo que nes nuestres composiciones, naguamos por ufrir un tipu de música que salga un poco del públicu 'folkie' pa espardise a toa clase de xente, lo mesmo n'Asturies que fuera, onde tengamos ocasión de llegar», asegura'l músicu avilesín.

'L'Aremu', fusión d'una danza quirosana recoyida por Xosé Antón Ambás y una diana lleonesa, xunta los reels 'Iris Fleadh', suenen ya nes redes como adelantru del camín abiertu por esta nueva banda asturiana.