Solemnidá nunes Lletres distintes

Una Selmana de les Lletres distinta y ensin la participación popular avezada, por mor de les midíes socio-sanitaries llantaes pol andanciu de la covid-19, pero compensada por una fonda solemnidá, asina va ser la cellebración de los actos consagraos esti añu a homenaxear a la lliteratura na nuestra llingua que van entamase dende'l viniente 28 de setiembre al 2 d'ochobre. Aplazaos dende la so data ya tradicional de la primer selmana de mayu, hasta'l momentu presente esistíen abondes duldes de si podíen llegar a desenvolvese los eventos previstos nes condiciones actuales y nun se descartaba una cancelación dafechu si éstes asina lo pidíen. A la fin, Asturies nun va quedar ensin esta cita tan importante cola so propia cultura y tanto la Conseyería de Cultura como l'Academia de la Llingua caltienen les actividaes d'un programa adaptáu a la situación escepcional que la pandemia impón en tolos ordes de la vida pública.

L'Aula Magna de la Universidá d'Uviéu va ser el sitiu escoyíu pola Academia pa oficiar el so actu institucional el viernes 2 d'ochobre. La principal estremadura respective a la de toles ediciones anteriores ye que nun va ser una convocatoria abierta al públicu, sinón restrinxía n'aforu y cincunscrita a la representación de distintos estamentos políticos, sociales y culturales. Según pudo saber esti diariu, la corporación llingüística espera cuntar nesta ocasión cola presencia d'autoridaes «de primer nivel y la más potente de tolos actos que se ficieran hasta agora», dalgo que podía traducise na participación oficial de les másimes autoridaes del Gobiernu del Principáu presidíu por Adrián Barbón, que ya tuvo presente como convidáu nes últimes cellebraciones del Día de les Lletres.

Nel trescursu del actu académicu va acoyese como nuevu númberu correspondiente al escritor Pablo Rodríguez Medina y fadráse la entrega del II Premiu Nacional de Lliteratura Asturiana a Xuan Xosé Sánchez Vicente. Estos, xunta'l discursu del presidente de la institución, Xosé Antón González Riañu, van ser los momentos cume d'una cita que poles actuales circunstancies va ser más curtia en duración y de la que s'esclui la habitual actuación musical que l'acompaña.

La Conseyería de Cultura va presentar el so propiu programa d'actividaes esti vienres 18 y del qu'hasta agora namás se sabe del conciertu que va entamar la Orquesta Sinfónica del Principáu d'Asturies (OSPA), dirixida por Olivier Díaz, el prósimu 28 de septiembre nel Auditoriu Príncipe Felipe d'Uviéu y con un repertoriu formáu poles pieces 'Covadonga' de Facundo de la Viña, 'Escenas asturianas ' de Benito Lauret, 'Danzas asturianas' de Julián Orbón y 'Asturias desde la distancia' de Jorge Muñiz. Como ta faciéndose en tolos conciertos de la formación sinfónica incluíos nel so ciclu 'Seronda', l'aforu ye limitáu y los asistentes al eventu tienen rexistrase nun formulariu afayáu a los protocolos de seguridá pola Covid-19.

Delles de les actividades previstes nel programa de Cultura enantes de la pandemia van vese suprimíes agora poles especiales condiciones nes que va tener de desenvolvese esta celebración. Caltiense l'homenaxe en remembranza de la escritora maliayesa María Teresa Villaverde Tuxa (1882-1934), a la que ta dedicada esta 41 edición de la Selmana de les Lletres y de la que se va rescatar nun volume la so obra conocía. Nos prósimos díes daránse a conocer los actos que sí van entamase y la manera na que habrán llevase a cabu.

Con públicu reducíu y metanes d'unes circunstancies escepcionales como les qu'enxamás se dieran nes más de cuatro décades de la so esistencia, la Conseyería y l'Academia coinciden en que la fiesta de la nuestra llingua tien de rellumar con tola so solemnidá y siguir remembrando un añu más el valir que representa pal conxuntu de los asturianos.