El Principáu va evaluar l'impactu económicu y social de la innovación y va ellaborar un mapa del talentu

El conseyeru de Ciencia, Innovación y Universidá, Borja Sánchez, presentó esti llunes la iniciativa xunto los responsables del Llaboratoriu d'Análisis Económicu (REGIOlab), Fernando Rubiera y Esteban Fernández. La Cátedra InnovA va crear un Observatoriu de la Innovación que va realizar un siguimientu de les polítiques d'I+D+i de los dellos axentes del sistema científico-tecnolóxicu asturianu, con indicadores pa midir el so esfuerciu inversor y el so impactu sobre'l texíu productivu. Dacuando, va presentar análisis y mapes de la innovación empresarial por territorios, según esplicó'l conseyeru.

L'oxetivu, dixo, ye «conocer el retornu», la riqueza que xenera la innovación y qué otros recursos xenera. Amás, va ellaborase un mapa del talentu que va facilitar la puesta en marcha d'un programa de mentores que van tutelar a estudiantes con espedientes académicos brillantes y van impulsar el so éxitu profesional. Per otru llau, va crease una rede nel esterior que va valir d'apoyu a la collaboración público-privada y que va dar soporte a científicos y investigadores asturianos.

La constitución de la cátedra universitaria va formalizase nos díes próximos cola firma d'un conveniu ente la sociedá Xestión d'Infraestructures Públiques de Telecomunicaciones del Principáu d'Asturies (GITPA), que depende de la Conseyería de Ciencia, y la Universidá d'Uviéu.

La Cátedra de la Innovación n'Asturies va tar integrada por investigadores del grupu REGIOlab, con una llarga trayectoria dedicada al análisis, evaluación y cuantificación de l'actividá innovadora de les empreses y instituciones nel Principáu d'Asturies. Va cuntar, amás, con una dotación presupuestaria de 65.340 euros pal exerciciu 2020, cantidá que va poder ser revisada en caún de los exercicios de los cuatro años de vixencia del conveniu.