Presidencia y Delegación piden prudencia a los que visiten el monte asturiano depués de l'aumentu de rescates

Nesti sentíu la delegada del Gobiernu, Delia Losa indicó qu'Asturies «ta convirtiéndose nuna comunidá de moda na que la xente se siente más segura y polo tanto vienen más», pero la xente «desconoz que'l monte asturiano ye mui guapo pero tamién mui complicao».

«Hai muncha xente que va al monte en chancles, igual que si fuera a la playa y eso ye lo que nun pue ser», indicó Delia Losa que tamién pidió prudencia.

La delegada del Gobiernu, Delia Losa, y la conseyera de Presidencia, Rita Camblor, atendíen a los medios de comunicación enantes de la xunta de coordinación ente Guardia Civil y SEPA na que participaron.

Camblor insistió en qu'Asturies ye una comunidá que da seguridá al turista y qu'ufierta de too, tanto playa como monte. Indicó que tán rexistrando más rescates porque dir de monte ta de moda porque la xente quier evitar les aglomeraciones de les playes y escueye otros puntos del Principáu.

Descensu del Seya y Xiringüelu

Preguntaes poles previsiones pa esti fin de selmana cuando tendríen que celebrase les fiestes del Seya y del Xiringüelu, en Pravia, tanto la conseyera como Losa recordaron que toles celebraciones tán suspendíes, polo que «nun tendría que dase nengún tipu de aglomeración».

«Vamos cuntar con dispositivos de les fuerces y cuerpos de seguridá per si hubiera dalgún grupu que sintiera la señardá de dir concentrase a la vera del Seya o al prau del Xiringüelu», dixo la delegada.