González Riaño: «La llingua nun ye de naide n'esclusiva, nin de les esquierdes nin de les dereches»

Asina lo indicó Riaño na Xunta Estraordinaria de l'Academia de la Llingua Asturiana pol Día de les Lletres Asturianes celebrada, por motivos sanitarios, nel Aula Magna de la Universidá d'Uviéu y a la qu'asistieron, ente otros, el presidente del Principáu Adrián Barbón; el presidente de la Xunta Xeneral, Marcelino Marcos; el rector de la Universidá d'Uviéu, Santiago García Granda; y la conseyera de Cultura, Berta Piñán.

Nel so discursu, onde tuvo un primer recuerdu a la situación sanitaria pela que pasa a Asturies y a les víctimes de la Covid-19, Riaño recordó que la Unesco pon al asturianu como una llingua en peligru grave de desaparición y que sería «inconcebible qu'Asturies permitiere que tal cosa pasare». Sobre too, señaló, cuando la Constitución española establez la oficialidá como modelu pa protexer les llingües propies.

Nesi sentíu, punxo a Galicia como exemplu «d'un billingüismu social harmónicu nel que tanto'l castellanu como la llingua de la comunidá conviven pacífica y llealmente». «Nós queremos facer lo mesmo y necesitamos entamar a facelo agora», indicó, pa reclamar una «política d'estáu» pal asturianu al traviés d'un «pactu mayoritariu ente los partíos y la sociedá» que fixe'l modelu d'oficialidá d'Asturies.

Asina, pidió a les fuercies polítiques buscar «con intelixencia y xenerosidá un alcuerdu de mínimos» pa esa oficialidá y ufrió a la institución que preside como «moderador pa contribuyir al llogru de la definitiva solución xurídica pa cola llingua d'Asturies».

«La llingua nun ye de naide n'esclusiva, nin de les esquierdes nin de les dereches. La llingua ye un patrimoniu cultural de tolos asturianos y asturianes que supieron caltenela a lo llargo de los sieglos hasta güei», sentenció.