Cultura impulsa cola RTPA una convocatoria de proyectos pa promocionar l'asturianu y el gallego-asturianu

La Conseyería de Cultura, Política Llingüística y Turismu, al traviés de la Dirección Xeneral de Política Llingüística, xunto con Radio Televisión del Principáu (RTPA), punxo en marcha una convocatoria de proyectos de producción pa promocionar l'asturianu y el gallego-asturianu.

La convocatoria quier ser, según señalaron dende'l Principáu al traviés de nota de prensa, un estímulu al sector cultural depués del impactu de la crisis sanitaria. El departamentu que dirixe Berta Piñán va destinar 133.800 euros a esta iniciativa.

Esta midida, de calter estraordinariu, tien como oxetivu la creación d'obres audiovisuales de temática llibre que pongan en valor la cultura asturiana nos sos más variaos aspectos.

Con esti propósitu, a la convocatoria van poder presentase trabayos de cualesquier xéneru rellacionaos cola música, les artes escéniques y plástiques, la lliteratura, el cine, el patrimoniu cultural y etnográficu, la historia o cualesquier otra disciplina, empobinaos tanto a públicu infantil como adultu, pa la so emisión en radio o televisión.

Los proyectos, que tienen de tar remataos y entregaos enantes del 31 d'avientu, puen ser documentales, musicales, programes d'entretenimientu o concursos, tanto televisivos como radiofónicos.

Amás, van tener que realizase nel territoriu del Principáu y usar como llingua l'asturianu o'l gallego-asturianu. Nel casu de les obres pa televisión, han ser accesibles pa persones con discapacidá auditiva y visual.

D'esta manera, el Principáu pretende impulsar el sector audiovisual como parte de la industria cultural asturiana y facilitar la creación de sinerxes ente productores y ceadores.

Esta convocatoria forma parte del paquete de midíes anunciaes en mayu pola conseyera Berta Piñán p'apoyar al sector cultural, que tán diseñaes p'amenorgar los efectos de la crisis provocada pola covid-19.