Una ventana con muncho que cuntar

Na competición oficial de cortometraxes relluma con lluz propio l'últimu trabayu de Tito Montero, 'Los ladrillos', una maxistral llección d'aprovechamientu del metraxe breve que nos sos intensos 19 minutos ufre una de les películes de mayor vuelu ya interés de la programación del festival. La memoria de los mártires de mayu de 1877 en Chicago y la familiar narrada en primera persona pol mesmu cineasta tracen relatos converxentes dica un güei llaráu de duldes incómodes y de costosu solventar ensin conciencia de quién somos y de ú venimos como individuos y como clase de la humanidá. Un gustosu exerciciu amás de perfectu equilibriu ente discursu políticu y bien dixerida espresión cinematográfica.

Reflexón o busca directa alrodiu de la memoria hestórica y de la identidá tán presentes tamién nos cuatro autores asturianos seleccionaos nel ciclu Esbilla. Xunta 'Vicente García Riestra, guardían de la memoria' (del que falamos embaxo), 'Lengua nativa' de David Castro indaga al través de les hestories arrepresaes en cartes y fotografíes la imposible biografía colectiva de xente al marxe de la hestoria oficial y esllarigaos en estremaos territorios. Un espaciu aparentemente más tanxible y llocalizable val-y a Manuel García Postigo pa tresnar 'Siberia' –la única cinta rodada nuna de les dos llingües propies d'Asturies del festival–, otra de les sorpreses curioses del programa, como l'anterior. Menos anovadora, pero non por ello ensin interés, ye 'Moru', de la esperimentada realizadora Ángeles Muñiz, otru retratu colectivu venceyáu a un llugar que trespasa lo etnográfico pa contar una hestoria d'algame universal.

Compitiendo na sección oficial Tierres en trance, afáyase otra de les contribuciones con sellu asturianu más resaltables d'esta edición de FICX –al llau de la imprescindible 'Vaca mugiendo entre ruinas' de Ramón Lluis Bande–, con 'La calle del agua', brillante ópera prima de Celia Viada Caso que rescata del escaezu la figura de la fotógrafa de Coráu Benjamina Miyar (1888-1961). Y si dellos de los documentalistes con más pesu artísticu del país s'enfoten na busca de xenealoxíes propies pal so cine dende la concencia hestórica o de clas, la autora d'esta película aporta la suya propia dende la concencia de xéneru pa reivindicar la memoria d'una muyer poco común del so tiempu y del llugar onde-y tocó vivir. A la fondura cola que desenvuelve el so relatu xúntase-y l'atractivu d'amosar delles de les imáxenes feches por Miyar que definen el so perfil resistente.