Borrar
Tiempu p'abellugase rodiaos de bonos libros

Tiempu p'abellugase rodiaos de bonos libros

Seronda. Narrativa con puxu p'arrepresar a los llectores, nueves entregues poétiques d'autores esenciales y obres infantiles marquen les últimes novedaes na nuestra llingua

Viernes, 4 de octubre 2024, 05:00

El tiempu de seronda ye afayadizu p'abellugase na intimidá de casa de les inclemencies meteorolóxiques y de la señaldá qu'anda nesta estación más aventada qu'en nenguna otra a la busca del so propiu techu. Nestos díes nun se concibe meyor compaña que la de los llibros y na nuestra llingua siempre hai tinta fresco onde escoyer, de mano porque la creativá de los autores del país trabaya con ganes lo mesmo qu'una realidá na que tovía-y queden a les lletres asturianes infinitibles anaqueles qu'enllenar de la gran biblioteca de Babel. A falta d'otros luxos, la lliteratura escrito nes dos llingües propies ufiértanos el de disponer d'obres pa tolos gustos, del más desixente al lúdicu y eminentemente popular.

Una preba d'estos últimos palos dala l'espoxigue constante de l'apuesta pola fantasía y la narrativa de xéneros pensaos pal entretenimientu o el maxín na que s'enfoten sellos como Radagast. Ente les sos últimes novedaes resalten el volume de relatos 'Coses rares' de Solinca Turbón, una autora que combina'l so llabor poéticu cola ficción nel sentíu más ampliu del conceptu y n'entrambos con un llinguaxe frescu, prestosu y trabayáu. Otra llangreana, con asemeyáu procuru pola escrita clara y averada a la oralidá, Ana Pereira, tres el so debú con 'Bederre', ufierta agora en 'Cuntadora' una distopía 'cuenquera' col mesmu vuelu irreverente y imaxinativu digna de nun dexar pasar. Y Nicolás Bardio, un talentu abatanáu cola mesma pasión en milenta xeres, vuelve amosar el so valir como narrador en 'Interferencies nel Akula', otru llibru incapaz d'aburrir a naide.

Tamién nel xéneru, nesti casu el policial, aporfia Manuel García Menéndez na so última novela 'Dientro del engrane', publicada n'Impronta, na que recupera al inspector Marcos Engrueba, protagonista de 'El visitante impropiu', pa tramar una historia cola curiosidá y amenidá que ya nos fascinara na obra qu'algamó'l Xosefa Xovellanos. La editorial xixonesa sigue puxando polos primeros llectores tamién con otros dos títulos igual de gustosos: 'La Ceniciena de Toya' de Victoria Jove y 'Lin el conexín' de Viviana Sgorbini. Al empar, publica un nuevu llibru d' Elías Veiga, una voz imprescindible y fonda de la nuestra poesía actual: 'Fueya caída'.

La diversidá más amplio marca tol catálogu de la veterana Trabe como son exemplu los sos últimos títulos: 'Caledonian Road', una suxerente y atractiva novela de Xurde Fernández que nos tresllada a la felicidá arrepresada nun branu xuvenil en Londres. Xunta ella, una obra n'eonaviego de Babel de cal Cadete (alcuñu lliterariu del cuañiegu José Manuel Gayol Suárez) que reivindica la maxa imperecedera de la tradición oral: 'D'outro mundo'. Y arriquez la so collección poética 'Pontiga' con dos nueves entregues d'entrambos autores fundamentales de les nuestres lletres: José Luis Rendueles, que vuelve al versu con 'Búcara' y Ricardo Candás, col so nuevu poemariu 'Bebi d'esta poza'.

L'Academia de la Llingua Asturiana pela so banda suma un títulu más a la so serie 'Os Llibros d'Entrambasaguas' con una obrina infantil de la poeta y maestra franquina Aurora Bermúdez: 'Llambisques', cola bayura y la espresividá que-y son propies a l'autora en llingua eonaviega.

Publicidad

Publicidad

Publicidad

Publicidad

Esta funcionalidad es exclusiva para suscriptores.

Reporta un error en esta noticia

* Campos obligatorios

elcomercio Tiempu p'abellugase rodiaos de bonos libros