'Terrén': una visión llocal de la cultura tradicional

Roberto González-Quevedo dirixe la coleición nueva de l'Academia y fálanos de los conteníos d'esti volume col que s'estrena. Amigu personal y compañeru nel so día na docencia de Vicente Rodríguez Hevia, resalta que la decisión d'abrir 'Terrén' con un llibru del llavianés tien abondo d'homenaxe «al llabor col que Vicente trabayó nel ámbitu de la etnografía con una seriedá y rigor exemplares» y que-y abultó afayadizu a la institución llingüística nun momentu nel que l'estudiosu afronta problemes de salú que-y impiden siguir col so trabayu investigador.

El responsable de la coleición y de la revista 'Cultures' desplica que'l llibru presenta de mano un trabayu de Rodríguez Hevia publicáu nesa revista: 'Del güertu a la casería: espaciu agrariu en Llaviana', un asuntu que ya tratara n'otres ocasiones, como fexo al analizar la presencia de la casería asturiana na obra de Palacio Valdés. Nel artículu que se rescata equi, apunta González-Quevedo que «n'estudiando l'espaciu agrariu, describe como se divide el territoriu na mente de la xente en vegues, lloses, güertes, pumaraes y otres plantaciones: ablanos, cerezales, etc. y cómo s'organiza too ello, al empar de cómo s'estrema tamién l'espaciu na propia casa. Ye un capítulu que nos introduz darréu na cultura tradicional del conceyu». Sobre'l mesmu tema recuéyese otru trabayu, específicamente dedicáu a los cultivos y en concreto al ciclu de la panificación col focu na escanda y otros cereales, los molinos, etc.

Otros ciclos de la economía tradicional que s'aborden son el de la mazana y la sidra o el del samartín, entrambos inda mui presentes nel conceyu llavianés hasta tiempos actuales. Xunta ellos, l'estudiu d'otros recursos de la vida campesino como la pesca o la caza. Y el director de 'Cultures' resalta sobremanera l'interés d'ún de los trabayos nos que se fala del horru «como foru del pueblu, un espaciu abiertu onde la xente se xuntaba a discutir o cenciellamente a parolar. Vicente non namás trata les distintes partes del horru o los sos usos, sinón que recalca esa otra función social». Non menos interés ufierta'l capítulu dedicáu a les cellebraciones festives de Llaviana: «Fai un estudiu mui rigurosu, conseñando los informantes, sobre les folixes na parroquia y n'aldea, les ilesies y capielles, el ciclu festivu del añu, les feries y mercaos o les cellebraciones tradicionales que van desapareciendo al empar qu'aparecen fiestes nueves».

González-Quevedo resalta que nestos trabayos «hai una visión de la cultura tradicional mui oxetiva, non l'avezada en buscar coses singulares, fantástiques, supersticiones, ye una perspectiva mui funcional alrodiu de cómo se caltenía la cultura asturiana nun momentu de cambiu importante na que la xente taba adoptando formes de vida nueves na economía mista d'esa zona y la simbiosi bien peculiar que salía d'ello». Con los siguientes títulos que dirán apareciendo na coleición, l'Academia, allampia por llegar a ufiertar «una visión de conxuntu de la cultura tradicional asturiana, al algame del públicu en xeneral, non namás d'especialistes, inda tamién estos van tener ende una fonte curiosa pa consultar».