«Tando muy apegada a la tierra trata un asuntu universal»

Ési ye'l filu conductor d'una traxicomedia basada nel universu de Perendi, el conceyu imaxinariu nel que Rodríguez Cueto asitia una serie de relatos escritos na primer década d'esti sieglu y recoyíos después en tres volúmenes. Una escoyeta d'ellos articula esta obra na que l'autor orixinal tresnó la dramaturxa y les escenes d'enllaz por encamientu de la Compañía, talo desplica Carlos Alba: «Lo nuevo qu'escribió Milio, féxolo ya pa poner n'escena y no que se recuperó de los cuentos hubo pocos cambios porque ya ellos mesmos sonaben mui orales. Fue relativamente senciello, dientro lo complicao». En cuantes a les razones que lu afalaron a llevantar la pieza, l'actor resalta «l'humor negru d'unos testos que falen d'esi entornu ente lo semirrural y lo urbano que ye Perendi, un llugar que podía ser una villa cualquier que fue importante d'eso que llamamos l'Asturies esvaciada. Lo que me prestaba ye que tando too tan apegao a la tierra trata un asuntu universal, como ye'l de la fatalidá. Un artista pinta coses tremendes que después pasen de verdá. Ye lo que me gustaba: que fuera actual, tuviere ambientao n'Asturies y conectao con dalgo universal». Del resultáu final que puede ver l'espectador, 'Cellero' amuésase contentu: «La obra, pa mi, ye mui completa. Suena bien, los personaxes son creyibles, cuenta una historia interesante y amás ríeste abondo».

Otru de los atractivos que-y llamó l'atención al responsable de la puesta n'escena foi la carga políticamente incorrecta de la que ye gustosu l'autor d'obres como 'Románticu' o 'El ciegu la esquina' y ye que, asegura: «Lo que más me presta ye que Milio failo con tala naturalidá y descaru qu'entra bien. Cuando lu llees sabes perfectamente per onde respira, pero como tien esa coña puede trescender lo ideolóxico y gustar a tou tipu de xente».

Al pesar d'esi posu ácidu y de representase en llingua asturiana, el director de la Compañía del Alba, preguntáu a propósitu de si dacuando tuvo mieu de que la obra nun llegara a ponese nel Teatru Xovellanos colos actuales responsables públicos de Divertia, ye claru: «Los primeros contactos col programador del teatru ficiéronse enantes de qu'hubiere elecciones, siguimos falando cuando ya había un equipu nuevu de gobiernu y en nengún momentu me dixo que-y lo impidieren programar. Como se sabe, la programación retrasóse por cuestiones alministratives y llegóme la confirmación definitiva cuando se produxo la salida de Vox del gobiernu. La sensación yera que la díbamos representar igual anque siguieren nél y como nun facemos apoloxía directa de la oficialidá, cuento que hubiéremos podío pasar». Respuéndelo ente rises, les mesmes qu'ensin dulda sonarán roblaes con aplausos na función qu'agora llega al coliseu xixonés.