«Seya ciencia ficción o non, esta ye una novela social»

Nel Morán (Trubia, 1959) ye maestru xubiláu y autor de títulos como 'Fabia' (2018) y 'Na sienda'l destín' (2020), entrambes editaes en Trabe. Agora publica nel sellu Impronta 'L'aire irrespirable', una distopía futurista sobre la imperfección del ser humanu a lo llargo la hestoria.

–¿'L'aire irrespirable' ye una distopía?

–Cuando la escribí nun taba pensando en nengún xéneru. ¿Ye distopía, ciencia ficción? Cuido qu'eso tóca-y al llector decidilo, ye llibre de facer lo que quiera colo que l'autor escribe.

–¿Cómo surde la novela?

–D'un artículu onde se falaba de la imperfección de la historia, cómo el ser humanu repítela una y otra vez polos sos erros y cómo esos erros tamién van repitiéndose ensin parar. D'ehí surdió la idea de facer una novela. Nin el pasáu nin el presente me parecía propio pa ello, por eso quixi treslladalo al sieglu XXXI, dalgo tan lloñe pa que tovía quedare más claro que la historia repetíase y que por muncho que quixéramos somos tan fatos los humanos que acabamos calcando los mesmos erros.

–¿Ye una llamada a que nun ser mui optimistes nel futuru de la humanidá?

–Yo cada día lo soi menos nesi aspeutu, pero tampoco obligo a naide a ser un pesimista acérrimu, caún puede pensar y creyer lo que quiera. Realmente pa min hai poca esperanza nel optimismu, aunque dalguna habrá digo yo, sinón nun tábamos equí (rises).

–¿Qué más puede desvelar?

–Ye un llibru d'histories, hai una central que lo encarrila too, pero a lo llargo d'ella van descabalgándose otres de personaxes secundarios. Y non namás ye una historia d'hestories, sinón que dientro la novela hai otra novela.

–¿Tien dalgún nexu colos sos títulos anteriores?

–El nexu ye evidentemente l'autor, tengo una manera d'espresame propia pa suerte o desgracia y ye narralo en primera persona. Fáigolo porque me presta, siéntome más cómodu y soi el típicu autor qu'enantes de ponese a escribir tien que tenelo definío absolutamente too, pero según avanzo voi decatándome de que tala manera de comportase d'un personaxe nun ye la d'él o que en talu sitiu l'aición nun me parez afayadiza, entós migayín a migayín voi tresformando la hestoria y acordies la escribo voi descubriéndola.

–Seya o non ciencia ficción, nel xéneru hai fantasía puro y hailo qu'inxer carga crítico. ¿Lo suyo ye esti casu?

–Claro, ye dalgo que tamos viendo na evolución del xéneru, pasó cola novela negra que col tiempu decantóse polo social y crítico. Tenemos un premiu Nobel como Ishiguro qu'escribió esa novelina tan guapa que ye 'Clara y el sol' onde ves que ye un futuru y al empar una crítica fonda a la humanidá. La mía nun sé si ye ciencia ficción o non, pero como tolo qu'escribo, puedo dicir que sí ye una novela social.

–¿Qué-y parez l'enclín polo fantástico nos autores mozos?

–Parezme que ta mui bien esi camín que sigue la mocedá, porque cuido que l'asturianu tien romper ya d'una vez de tar constantemente falando de lo mesmo. Veo que la xente mozo d'anguaño rompe dafechu llendes y eso puede llograr que la nuestra lliteratura s'esparda muncho más. Escritores hailos, necesitamos llectores y eso nun se consigue namás cola 'lliteratura puro', tienen disponer de toa triba de posibilidaes.

–Usté fue miembru de Conceyu Bable. ¿Cómo ve la realidá pasáu mediu sieglu?

–Ye una realidá dafechu distinto, anque siguimos marxinaos por muncho que nos digan que poco a poco va llograse too. Pero daquella nun ye que tuviéremos marxinaos, ye que facíen xiringoncia de nós. Cuando dibes a una reunión con otres asociaciones o partíos, esos qu'agora tán a favor, d'aquella facíen xiringoncia del asturianu. Lo que s'algamó fue gracies a la llucha constante. C.B. fixo muncho, pero tamién la Xunta o agora Iniciativa. Tolo que se faiga ye poco. Los políticos enantes y agora siempre-y dieron la espalda al pueblu.

• Temas
• Alitar Asturies