«El mio ritmu d'escritura ye dir pocoñín a poco»

L'escritor Xosé Anxelu Gutiérrez Morán (Avilés, 2023), una de les voces más personales de la lliteratura asturiana actual y con una prestosa obra fecha a pocoñinos, de la qu'hasta agora namás diera a conocer la so faceta poética o como divulgador científicu, vive unos meses d'intensa fortuna. En xunetu, algamaba la segunda vez el Premiu de Poesía Xuan María Acebal col so llibru 'Les hores de lluz' y esta selmana consiguía un nuevu gallardón, el del Premiu María Josefa Canellada de Lliteratura Infantil y Xuvenil col volume de relatos 'Contando colos deos'. Una feliz coincidencia que l'avilesín recibía gustosu, tirando del humor, cuando aseguraba en declaraciones a esti diariu que se presentara a entrambos premios «como'l que merca dos décimos de lotería, a ver si polo menos tocaba ún».

El xuráu del últimu d'estos premios -formáu pol alcalde de Cabranes, Gerardo Fabián, Alonso Zamora Canellada, fíu de María Josefa Canellada, les escritores Alba Carballo y Blanca Fernández Quintana, xunta la música Marina Pangua- nel so fallu, tres resaltar «l'altu nivel de calidá» de los orixinales presentaos -trece en total-, valoraba na obra ganadora el so enllaz cola tradición oral, el so posible l'intercambiu ente adultos y neños, l'altu valor pedagóxicu y l'usu d'una llingua rica y curiada». Una valoración que casaba coles palabres del propiu autor en conversa con EL COMERCIO: «El mio obxetivu yera facer unos cuentos que fueren participativos pa involucrar nellos tanto a los rapacinos como al contador». Nacíos va unos años, mientres la estancia del so autor n'Arabia Saudí como docente de la Universidá Rei Abdullah de Ciencia y Tecnoloxía, los relatos qu'igüen 'Contar colos deos' y otros qu'a la fin quedaron fuera, tuvieron como primer receptor al so fíu Mael, pal que los foi imaxinando col fin d'entretenelu enantes de durmise. Les manes del pá yeren les ferramientes coles que s'aidaba pa construir situaciones y personaxes «faciendo traces colos deos» y por eso, los testos que presentó al premiu, van precedíos d'unos dibuxos nos que se representen les estremaes figures dixitales pa lleelos en voz alto y que fexo Nora, la so otra neña.

L'escritor avilesín señala que'l so enfotu a la d'escribir estos doce cuentinos breves ye'l de que, cuando se editen, pueda producise dalgo asemeyao a esa esperiencia qu'a lo llargo de munches nueches compartieron el so fíu Mael y él mesmu. Los rapacinos a los que van empobinaos, asítialos nuna franxa d'edá como la que tenía el suyu naquel entós: ente los cinco o seis y los once años. «Él tien agora doce cumplíos y de xuro que-y va prestar en dalgún momentu saber que tuvo bastante que ver nesta historia, anque los cuentos ya nun-y lleguen», apunta'l so autor.

Doctor en Bioloxía pola Universidá d'Uviéu ya investigador del Centru Oceanográficu de Xixón, Xosé Anxelu Gutiérrez Morán siéntese enantes que nada poeta. L'autor d'obres como 'Países' (Trabe, 2009), 'Diversa memoria' (Trabe, 2012) y 'Un ciertu desorde' (Suburbia, 2012), revela que «la poesía ye'l xéneru nel que me siento más cómodu, permítime dir a un ritmu lentu de trabayu que ye'l míu al escribir, dir faciendo un poema con tol tiempu del mundu y después poneme a xuntalos». Nesi sen, inda nun lo descarte dafechu, nun dulda n'afirmar que «una novela güei per güei escede les mios capacidaes de trabayu». Na forma del relatu breve, sicasí, atopa otru espaciu afayadizu nel qu'espresase: «Un cuentu tien la estensión que tu quieras da-y y les idees puedes desarrollales igual que nun poema, dir contando coles sorpreses finales y tratar temes variaos. Asina ye la mio manera de trabayar, pocoñín a poco», confiesa. D'una manera asemeyada fueran disfrutando los sos llibros publicaos la fiel parroquia de llectores que lu tienen de referencia y que ya cuenten col guiñu prósimu de poder siguir faciéndolo cuando estes dos obres premiaes: 'Les hores de lluz' y 'Contando colos deos' remanezan vives en tinta y papel.