Xulio Viejo (Uviéu, 1968) acaba publicar 'Una introducción a la fonoloxía asturiana' (Trabe), un esaustivu manual de la materia que pon na Universidá d'Uviéu y tien pa sacar nel mesmu sellu la novela 'Onde'l caos se texe y destexe'.
-Va diez años cuando empecé impartir na facultá l'asignatura de Fonética y Filoloxía había un montón d'estudios dispersos o sobre aspectos parciales, pero non un testu o manual que lo sistematizara y esa fue la mio idea inicial. Nesti tiempu fue creciendo al poner n'orde los materiales y desarrollar teoría según tiraba del filu.
-¿Qué relación caltién cola so 'Formación histórica de la llingua asturiana'?
-Aquel trabayu tenía una base fonolóxica importante pero yera un estudiu históricu y l'enfoque yera sociollingüísticu. Agora céntrome en materia de la llingua actual dende la teoría fonolóxica, pero aparte de la descripción actual, aprovecho los propósitos teóricos y nuevos datos pa retomar la evolución del idioma.
-Nesi sen, ¿qué novedaes ufierta?
-En 'La formación' consideraba distintes variaciones na llingua en términos de socioestilística, había formes más prestixoses que son les que tienden a estendese. Agora olvídome de la cuestión del prestixu, que siempre ye dalgo suxetiva y básome en datos estrictamente fonolóxicos. Ello llevóme, por exemplu, a atender pa la cantidá nel análisis de les vocales y les sílabes, y llegué a la intuición de qu'en variedaes del asturianu como les de la mitá occidental esa duración tien un valor fonolóxicu relevante. El retu yera desplicar cómo se llegara a esa situación y cuálu ye'l xuegu históricu d'alternancies. Eso permite un discursu qu'ayuda entender meyor la formación del espaciu llingüísticu y la propia historia d'Asturies.
-¿Tamién a baltar la teoría de 'los bables'?
-El relatu de 'los bables', de qu'hai unos sistemes romances qu'evolucionen de manera autónoma dende'l llatín como si les distintes zones d'Asturies evolucionaran aisladamente nestos 2.000 años, nun tien un pase. Les fronteres llingüístiques tienen una distribución irregular y complexa, cierto, pero eso respuende a procesos históricos coherentes y qu'afecten de manera unitara a tol territoriu. Son factores de tipu social, cómo se comuniquen unes zones con otres, la esistencia de villes o poles más o menos influyentes, y eses variaciones son parte d'un mesmu procesu históricu.
-¿La oficialidá garantiza'l futuru de la llingua?
-Ye una posibilidá inescusable de futuru. Va depender de factores complexos: la disponibilidá económica de la comunidá o la voluntá de la población, pero claro que la sobrevivencia pasa por tener un marcu xurídicu sólidu y afayadizu.
-Tien pa salir una novela. Fáleme d'ella.
-Ye un llibru qu'escribí n'homenaxe a mio padre. Morrió l'añu pasáu, yera un home de muncha edá y muncha memoria, tenía un anecdotariu inmensu y prestába-y contalo. Aproveché'l confinamientu pa recoyer esos materiales, da-yos una coherencia y un marcu narrativu nel que se pudiera acoyer un llector con cierta comodidá. La mayor parte de los materiales nun son ficticios, dellos ya aparecieron na anterior novela 'Los araxales de la vida' y por eso nun hai una ruptura cien por cien con ella.
-¿Cómo ve la lliteratura que se fai güei?
-Cola satisfacción de que siga viva y creciendo. Incorpórense autores nuevos a los qu'hai quien critica una cierta rebaxa n'esixencies de léxicu, pero creo que tamién se ganó en cierta normalidá espresiva. No lliterario hai escritores mozos qu'esploren xéneros d'entretenimientu pa conectar con un públicu más ampliu y al mesmu tiempu la pretensión de construir una lliteratura con cierta dimensión intelectual nun se perdió nin muncho menos. Ye'l meyor escenariu que podíamos imaxinar va años.
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.