Savia nueva para el asturianu

Rodríguez Medina, hasta agora académicu correspondiente, valora'l pasu a numerariu como «el mayor llogru que pudiere suañar personal y profesionalmente» y ve en nomamientos como los de los últimos años «una política intelixente de l'Academia de renovar, pasando poco a poco'l testigu de les xeneraciones históriques a les nueves». Coincide nello la so compañera d'escoyeta: «La institución ta integrando xente más mozo, mui formao, con otres perspectives y que vivieron otru tipu de situación a la de los entamadores. Cuanta más xente y de tolos pefiles posibles, meyor pueden complementase distintos puntos de vista, sumar ye lo importante».

A los nuevos académicos prestába-yos contribuyir na institución nes estayes más averaes a los sos ámbitos de trabayu. Asina, Menéndez, profesora de Llingüística Románica y estudiosa nesi campu, allampia «poder aportar sobretoo nel terrén de la investigación, pero entro dimpuesta a trabayar no que se me pida». Fai una estimación positiva del avance algamáu nesa disciplina: «Tenemos filólogos mui bien formaos, profesores enseñando ya investigando que son de reconocíu prestixu en tol ámbitu académicu: Ana Cano, García Arias, Ramón d'Andrés, Xulio Viejo con una trayectoria científica incuestionable y un trabayu de calidá altísima». La lliteratura y la docencia, son les dos seches onde-y pruyía apurrir el so conocimientu Rodríguez Medina pal que «ún de los mayores llogros que tuvo l'asturianismu y motor de la normalización foi el de la creación cultural, sobremanera la lliteraria. Ye impensable concebir la Asturies d'esti últimu mediu sieglu ensin esi aporte fundamental y de proyección de la propia sociedá de la que naz. Escribir n'asturianu date una singularidá y apertura a un mundu a la que nun llega'l castellán y dígolo como autor billingüe», afirma.

Diversa ye la percepción que caltienen respective a la situación xeneral de la nuestra llingua anguañu. L'escritor entreguín reconoz que «socialmente avanzóse muncho, hai más aceptación y mayor usu», pero esmolezlu «l'espardimientu de ciertos aires estremistes que quieren volver a un monolitismu cultural y tamién la sustitución nos nenos más nuevos de los referentes na tresmisión que teníen nes persones mayores polo que-yos llega de les redes sociales o plataformes d'entretenimientu». Claudia Elena, sicasí, confiésase «de natural optimista» y ve motivos «pa celebrar qu'esta llingua sigue mui viva y alitando nos miles d'asturianos que nun nos damos y facemos d'ella la nuestra manera de siguir y tar nel mundu. La oficialidá ye un fitu necesariu y cuido que va llegar por 'maduro', pero nun ye'l bálsamu de Fierabrás si nun vien acompañada d'unes polítiques series de normalización y que permitan asegurar la tresmisión xeneracional. En tou casu, ser optimistes parezme la meyor manera d'encarar con convicción lo que naguamos pal futuru del asturianu».