«Reivindico l'activismu como una forma de pensamientu que cambia la realidá»

El pasáu 8 de xineru l'investigador Llorián García (Caldones, 1987) algamaba, con un Sobresaliente Cum laude, el doctoráu en Historia del Arte y Musicoloxía cola defensa de la so tesis 'Acustemoloxía de la nueche en danza: descripción etnográfica y recursividá', la primera presentada n'asturianu d'esa especialidá académica na Universidá d'Uviéu. Ya col grau de doctor, l'etnomusicólogu desplicaba a esti diariu el sentíu d'un trabayu que parte del conceptu 'acustemoloxía' (xuntanza d'acústica y epistemoloxía), alcuñáu pol estudiosu Steven Feld pa referise a les formes del saber xeneraes al través de la escucha del soníu y aplícase al movimientu de les nueches en danza «como corriente cultural y tendencia dientro'l baille asturianu, porque dime cuenta que facía una operación que dende otros ámbitos se ta teorizando como mui relevante y que nesti casu consiste en convertir lo que yera un oxetu de representación, un conceptu del baille orientáu namás a la eshibición nos escenarios nun mediu d'alcuentru nel que toos participen. Na tesis ensálzase esi xestu pa dicir qu'hai dalgo importante que se ta cociendo ehí», afirma.

Les nueches en danza, entamaes abenayá por Xosé Antón Ambás y Ramsés Ilesies dende l'ATOAM (Archivu de la Tradición Oral d'Ambás), son una corriente conectada, a xuiciu de García, con otres asemeyaes que se tán dando en Galicia o cola cultura bretona de les fest-noz, por poner casos, pero considera importante resaltar que «el floriar d'esti movimientu ye un llogru colectivu de los grupos d'investigación que dende los años 80 lleven tratando de conocer más sobre'l pasáu del baille tradicional, cuasi desapaecíu entós, pa tentar da-y nueva vida y un futuru». Nesi sentíu, la tesis reivindica muncho que los movimientos sociales, la xente cuando s'organiza pa facer coses, non solo son actores que xeneren una demanda a les instituciones, son actores cognitivos, según la idea que garro del investigador Antonio de la Fuente, «formes de pensamientu que col so activismu cambien la realidá y la relación que tenemos col mundu», señala.

Al empar, l'etnomusicólogu, rellaciona na so tesis esti fenómenu con otros de calter emancipador que se dán en diversos llugares del planeta, como'l de los campesinos que s'organicen pa ocupar tierres nes que trabayar o los que dende un discursu de xéneru lluchen por espacios seguros. Arriendes d'ello, caltién que «la nueche en danza puede ser vista tamién como una zona temporalmente autónoma, un acontecimientu qu'inda seya efímeru, nel tiempu que dura, instaura unes regles de les coses, distintes que les normales y esa ye una dinámica que ta empezando a espoxigar en munchos movimientos mui distintos a nivel mundial, non namás relacionaos cola música y que tienen nel centru una preocupación pol papel de la tierra, l'espaciu, los llugares nos que vivimos. Ye una de les coses que m'interesa, porque munches veces les práctiques culturales o artístiques adelantren futuros que tán latentes. Son ensayos pa esperimentar con otres maneres d'entender el territoriu y los cuerpos, una parte lliberadora, no que diz muncho la participacion de los colectivos feministes y queer en tou esti movimientu», defende