«Naide dulda que la música de gaita funciona pal públicu y non namás pal asturianu»

El gaiteru Flavio R. Benito (Uviéu, 1971), profesor del instrumentu nel Conservatoriu de Música, ta acabante asoleyar una nueva edición del so métodu 'Alborada' (Trabe), un trabayu revisáu y actualizáu qu'inclúi un capítulu amestáu con venticinco trescripciones más de pieces que nun taben nel volume orixinal publicáu en 2011.

Pal so autor esti métodu ye «una propuesta de repertoriu pa los estudios de gaita nos conservatorios elementales de música, un catálogu de partitures secuenciáu por niveles de dificultá y vien a cumplir l'oxetivu de dotar a cualquier que s'anicie na gaita y quiera dir conociendo les pieces, dende les melodíes más cencielles y amañoses pa empezar a tocar l'instrumentu, mui cortines y nunos ámbitos melódicos mui escuetos, hasta la persona que lleve 3 ó 4 años tocando, dende cantarinos populares a pieces pal baile a lo suelto como la xota o la muñeira, tan ehí contemplaes».

Desque saliere la primer edición de 'Alborada' hasta güei, la realidá de los estudios del instrumentu y el mesmu espoxigue de la música venceyada a él, ye bien distinta, como reconoz el propiu Benito: «Les coses cambiaron afortunadamente a meyor. El procesu de poner clases entamó nos 80 con Xuacu Amieva y dende entós p'acó somos unos cuantos los que echamos la vida nello, y amás bona parte de nós tenemos formación musical n'otros instrumentos (nel mio casu fixe estudios de flauta trevesera), tou esi bagaxe académicu musical acabamos adaptándolo tamién a la gaita», desplica. Foi una aportación importante, inda l'autor del métodu remembra que «el procesu de la gaita ye paralelu al de la sociedá asturiana, los gaiteros siempre fueron adaptándose al so tiempu: a finales del XIX y primeros del XX incorporen músiques de xéneros populares como la polka o la mazurca, después seríen habaneres, tangos, foxtrot les que pasaron a amestase a los repertorios de gaita. Lo que tamos faciendo nos últimos 40 años ye siguir faciendo que l'instrumentu seya d'interés pa los asturianos nesti tiempu del spotify y otres plataformes dixitales».

Nesi sen, considera que «la creación de bandes de gaites o el surdimientu de grupos de folk celta condicionónos a toos pa llograr instrumentos que tuvieren afinaos d'una forma temperao y ehí dieron la batalla bien dada artesanos como Alberto Fernández, verdaderu estandarte de la gaita asturiana moderna. Supimos adaptanos con ésitu a los tiempos», asegura. El boom vivíu na segunda metá de los 90 foi, pa Flavio R. Benito, un auténticu puntu d'inflexón: «Foi increible'l saltu que se da ente 1984, cuando sal primer discu de Xuacu Amieva, 'Onde l'agua ñaz' y 1998, col discu d'Hevia. Nesos 14 años, de nun haber sitiu onde dir a deprender la gaita, creénse escueles privaes, asociaciones culturales, bandes, y dende les agrupaciones hai inquietúes de trabayar sobre la música del país, d'arreglala d'alcuerdu a unes estétiques y formes que pudieren ser atractives», señala.

Foi la consolidación d'un camín esitosu que sigue dando frutos güei, como lo amuesa'l fechu recién de que la Banda de Gaites Villa de Xixón recibiere'l premiu a la meyor agrupación estranxera nel pasáu Desfile de San Patricio en Nueva York, una noticia que'l músicu uvieín contestualiza afirmando que «ye la preba de que tán faciéndose bien les coses, munches veces gracies al esfuerzu d'instituciones particulares y del mesmu gustu pol instrumentu. Ya naide dulda de que la música de gaita funciona pal públicu y non namás l'asturianu, sinón el de cualaquier parte del mundu».

Una iniciativa importante p'afitar el futuru del nuestru instrumentu más popular foi la creación va dos años del Conceyu de la Gaita, del que Flavio R. Benito forma parte dende l'entamu. El músicu apunta que «veníamos d'unos cuantos años de tar caún metíu nos sos proyectos personales o la so actividá profesional, y cayimos na cuenta, sobremanera la xente más mozo que repetimos esfuerzos y nun aprovechamos los conocimientos que se van adquiriendo porque nun los compartimos. Pensamos que ye importante volver a texer redes pa compartir, necesitamos más metodoloxía, más trescripciones o estudios de técnica. Son trabayos que nun se publiquen y que esos materiales d'interés tengan una canal pa ser compartíos al través de la web del Conceyu». El propósitu fundamental ye pal músicu uvieín «crear una casa común y visibilizar al gremiu, col interés puestu en que nos sirva pa llevanos cincuenta años más p'alantre», afita.

• Temas
• Alitar Asturies