Una llingua abierta al mundu na capital del versu

A lo llargo de les últimes décades, la xera desenvuelta por universalizar la poesía n'asturianu y el propiu idioma poniéndolos na preba de recrear la obra de maestros de la lliteratura de tolos tiempos y toles llingues foi fecunda sobremanera. Ente los nomes propios que resalten pola so dedicación a esti trabayu, amerita un sitiu d'honor el de Xosé Gago, traductor de Safo, Kavafis o una primer parte de 'La Odisea', exemplares en rigor y elegancia discursiva. Xunta él podemos asitiar otres versiones qu'algamen la mesma condición de fitos: 'Cincuenta poemes ingleses del sieglu XX', de José Luis Piquero; 'La tierra ermo' de T.S. Elliot fecha por Alfonso Velázquez; 'Sonetos' de William Shakespeare d'Héctor Fernández o les 'Obres completes' d'Ausias March qu'amañó Pablo Suárez García. Ente los poetes contemporáneos que más empeñu punxeran na escritura en voz propia de versos ayenos ye obligao citar a Xuan Bello y los dos tomos de versiones que firmara: 'Sieglu XX, cambalache' y 'Colección d'identidaes', a la vera d'Antón García, autor del volume 'En casa ayena' o de los magnos 'Xuegos p'amostalgar la muerte' de Joan Vinyoli y 'Les manes enceses' d'Eugenio d'Andrade.

Dende les páxines d'Alitar ufiertamos una breve amuesa d'esti xéneru, sumándonos asina a la cellebración el pasáu domingu 21 del Día Internacional de la Poesía y a la iniciativa entamada pol director eméritu de la Fundación Princesa d'Asturies, Graciano García, pa qu'Asturies seya capital mundial del versu tamién cola so llingua.