«Llevaba dientro facer esta novela dende diba tiempu»

Marina Pangua Cuesta (Uviéu, 1992), una autora hasta agora cásique desconocida –inda non nel ámbitu de la música asturiana–, algamaba esta selmana el I Premiu 'Muyer' de Narraciones Trabe cola so novela 'Pel norte n'El Cantu Llunada'. Profesora de francés en Secundaria y componente nel so día del grupu folk Verdasca y del conxuntu de música tradicional Muyeres, tenía publicaes delles traducciones de Guillaume Apollinaire y ésta ye la so ópera prima. Una novela, a la que'l xuráu califica como «muncho bien estructurada, vertebrada pola música, de llectura esixente, escrita con voluntá d'estilu y enllena finura». Nel fallu empondérase tamién el so calter de «obra coral, na que los personaxes van moviéndose xeográficamente dende un pueblu d'Asturies a países y ciudades europees, movimientu que diversifica'l paisaxe y los ambientes».

La ganadora d'esti primer premiu, creáu pol sellu Trabe col oxetivu de promover la creación lliteraria n'asturianu d'autoría femenina, en declaraciones a esti diariu y cola sorpresa tovía en calletre «mui feliz, agradecida y emocionada» por un gallardón dotáu con 2.000 euros y la publicación del que, desvelaba «quixo la casualidá de que surdiere y viniére-y como un guante una novela que taba prácticamente terminando nel momentu de la convocatoria. Foi como una señal de que tenía de mandalu». Alrodiu de la pulsión que la encarriló a escribila, Pangua afirma que «llevaba dientro el facela dende diba tiempu pero hasta que me punxe a ello, namás lo tentara con testos de tipu diariu y más bien pa min, pero llegó un puntu en que decidí entamalo a los dos meses de nacer la mio fía. Foi el momentu de sentame al llabor y mientres ella durmía, yo escribía», relata ente rises.

Alrodiu del procesu d'escritura, la so autora asegura que foi «llaboriosu y muy concentráu, anque enantes de que me punxera con ello ya taba xerminando dientro min. Notélo según la escribía porque me diben llevando unes coses a otres, como si surdiera con muncha fuercia dientro lo que yo tenía arrequexao». El puntu de partida llegó-y de forma casual: «Un día que taba conduciendo ocurrióseme una idea y en llegando a casa púnxeme a tirar del filu. A partir d'ehí foi viniendo too». Manifiéstase d'alcuerdu col xuráu na definición de novela coral pa esta hstoria que ye «la de cuatro cases d'un pueblu ficticiu, pero que podíen ser munchos reales d'Asturies, van entetexéndose les histories de los personaxes que vienen d'eses cases, les sos families y el propiu pueblu pasa a ser tamién un protagonista más, Con esti filu conductor voi falando de munches coses: d'identidá, amor y desamor, maternidá y non maternidá, d'éxodos, viaxes, o de la tradición». La oral ye una de les fontes nes que bebe «por munchos motivos , hai personaxes venceyaos a ella y ta mui presente la música tradicional, cantares que van dexando buelga no que pasa a lo llargo los capítulos del llibru», desplica.

De cualquiermiente, Pangua aclaria que nun se trata d'un relatu ambientáu nun tiempu pretéritu ni esclusivamente rural sinón presente y desenvueltu en diverses xeografíes: «Reflexa diferentes xeneraciones de les cases, pero aparez la realidá actual de los pueblos onde hai personaxes mui distintos, dende'l que lleva tola vida viviendo ellí o el que ta faciendo una estancia de doctoráu en París. Ye una historia de güei inda viaxa nel tiempu de los personaxes pa dexar filáu el so pasáu y el so presente».

Énte un premiu concebíu p'afalar la creación narrativa de les muyeres, l'autora uvieína considera a cuentu de la presencia tovía insuficiente d'elles nes nuestres lletres que «tamos recoyendo la collecha de tantos sieglos nos que'l qu'escribía o taba fuera casa yera l'home y ta constando un puquiñin escapar de tantu tiempu en segundu planu na cultura, creo que vamos per bon camín, anque tovía falta que nos atrevamos un poco más a facer sentise la nuestra voz». Polo que toca a la suya, confiesa que'l gallardón valiéra-y como estímulu pa continuar otros proyectos lliterarios nos qu'anguaño ta metida y qu'espera ver avanzar.

• Temas
• Alitar Asturies