Les Lletres remembren el compromisu de Nel Amaro «cola cultura y la llibertá»

La conseyera de Cultura, Berta Piñán, -que presidió l'actu institucional nel Auditoriu Teodoro Cuesta, a la vera l'alcalde Aníbal Vazquez-, evocólu dende l'alcordanza personal como «una presencia continua na lliteratura asturiana y un hermanu grande nel oficiu d'escribir», y como creador, calificólu de «exemplu d'honestidá y bon facer, un paradigma de modernidá y un referente pa los artistes mozos». Mentantu, el rexidor del conceyu, recalcaba el so compromisu «col asturianu, la cultura y la llibertá, dalguién inolvidable de verdá».

L'escritor y amigu d'Amaro, Xandru Fernández, coordinador nes actividaes del so homenaxe, señaló la cierta dificultá a la que s'enfrentó a la de buscar «una manera de xuntar toles cares d'un personaxe que yera tópicamente inabarcable, una d'eses persones de les que se diz que ye inclasificable, incalificable, versátil, prolíficu: nel casu de Nel, ye un de los pocos casos onde afirmar eso nun ye una esaxeración, sinón quedar curtiu», aseguró. Nesi sen, caltuvo que col llibru 'Pruebes d'autor. Les siete vides de Nel Amaro', nel que se xunten los trabayos d'otros tantos autores alrodiu del so legáu y el so contestu, «la nuestra idea yera salinos del marcu convencional de la biografía o del acercamiento eruditu a la obra pa ver lo qu'había detrás de la so figura».

Tocante a la vixencia del so llabor creativu, Fernández resaltó el calter de «iconu pop» qu'algama güei (asina lu retrata'l diseñador Marco Recuero nes imáxenes qu'ilustren esta Selmana de les Lletres) y foi más alló, al considerar que de cuantayá foi «un precedente na manera d'entender lo popular y lo culto mui particular. Na cultura asturiana de los 80 hai dos iconos que funcionen como referentes que s'oponen ya incluso se repelen: ún ye Nel Amaro y l'otru Juan Cueto. Nun ye una estimación valoratible: los límites que traza ún de la cultura asturiana nun ta dispuestu admitilos l'otru. Y como de Cueto ye más fácil que falen otros, tenemos equí la responsabilidá d'amosar a Nel Amaro», defendió.

Un rellumu significativu d'esa personalidá poliédrica y tresgresora puede adicase nel documental que se proyectó en terminando l'actu y na esposición que s'inauguró na Casa de Cultura de Mieres, con presencia de la vilda del homenaxeáu, Marta Baquero. Ésta, en declaraciones a esti diariu, sorrayaba como una de les principales virtúes de Nel Amaro el fechu de que «conectaba mui bien cola xente xoven, animaba a tolos que queríen escribir o facer proyectos culturales y entendíalos. Taba con ellos pa lo que fuere y ellos alredor d'él».

Enemigu de les pompes institucionales, la so compañera espresaba que «güei taría contentu, non pola cosa oficial, sinón polos munchos amigos que tán detrás», y a propósitu del so legáu: «Ehí ta la obra, fecha nunos años mui difíciles, cuando él y otros dixeron: 'hai que sacar esto adelante, empezar a escribir n'asturianu'. Y él siguió siempre na so llinia, nun cambió». Que sigue vivu amosábalo Nun Tris pela tarde, cola llectura dramatizada de la so pieza 'Antígona por exemplu' y los actos que lu van recordar estos díes.