«La mio idea ye que la tradición ye irrepresentable»

Doctora n'Arte, artista visual y música del dúo L-R, Leticia Baselgas (Xixón, 1984) reflexona sobre conceptos como identidá, tradición o autenticidá en 'Diarios d'una panderetera' (La Fabriquina), un ensayu tan desllumante como suxestivu col ganchu de la meyor novela. Dende Baselgas, el llugar onde vive, fálanos d'ello.

-¿Cómo definiríes el viaxe personal y colectivu que percuerren estos diarios?

-Ye una búsqueda, el fechu d'alcontrar la mio identidá como asturiana al principiu nun grupu de baille 'regional', cómo vivo esa representabilidá de lo asturiano al través de lo folklórico , y cómo por munchas esperiencias personales que voi teniendo y que van xuntándose con reflexones teóricas, acabo descrubriendo qu'hai otras realidaes. Y voi construyendo una narrativa non solo de lo que soi como persona nesi procesu de maduración sinón tamién cómo ye la mio rellación con tol ámbitu de la cultura asturiana. El filu conductor ye la pandereta porque ye el simbolu que siempre ta presente y como al final acabo entiéndome como panderetera, tolas allegrías y frustraciones polas que pasé hasta llegar a entendelo dende un puntu de vista más lliberador.

-De metanes confronta conceptos esbariadizos: tradición, pureza...

-Xuego tol tiempu nuna dialéctica ente lo verdadero y lo falso, porque acabo alcontrando que lo folklórico ye lo relativametne falso frente a la idega de lo etnográficamente veraz, entós yo quiero asociar la mio performance a una veracidá performativa y na etnografía parez que la alcuentro pero acabo atopando otru sistema de control igual de represor casi que'l que veia nel grupu de coros y danzas franquista. Ye too una dialéctica lo que ye verdá, mentira, pureza, lo que ye auténtico y lo que nun lo ye, lo que nos define y lo que non, y mezclao cola mio esperiencia personal en anécdotas de vivencias que confronto con tola teoría que voi alcontrando; faigo una reflexión del grupu folkloricu dende Michael Foucault o al final otra más averada a la lliberación na idea de llegar al caos dende Guattari pa poder poner un orden personal que siga simplemente la pulsión.

-Figúrome que la perspectiva de xéneru yera irrefugable.

-Claro, dende qu'empieza la mio esperiencia hasta'l final ta too bañao del sesgu de xénero por tolos llaos, porque ser muyer va implicar unos condicionantes corporales que'l pasianu tenía o non. Falo tamién de la representación de la muyer nel espaciu públicu, por qué la pandereta siendo un elementu de poder. que siempre lo fue, cuando yo llego a lo etnográfico empiezo a escuchar que ye un instrumentu de segunda. Hai una reflexón de tolos condicionantes que viví nel ámbitu de lo folklorico y lo tradicional siendo muyer. Si fuera paisanu seguramete las mios reflexones serían otras.

-¿Nesi marcu qu'afaya tocante a la tradición?

-Faigo básicamente una interpretación, plantego entrugas retoricas a las que nun doi rempuestas porque nun creo que las haya, pero la mio idea de la tradición ye que ye dalgo irrepresentable. Utilizo la metáfora del caldín, una pulsión que parez que tola xente averada a esi mundu siente pero que ye mui difícil espresar, porque en fondo ye dalgo mui pasional, parto d'esar irrepresentabilidá. Acabo determinando que na música que yo fago niégome a ser una mera repetidora y intento dir más allá en busca d'una voz propia porque entiendo que ye mui cosificador muchas veces lo etnográfico. Apelo a la llibertá porque acabo topentando con esperiencias que nun m'agradan, por exemplu cantar lletras de la llirica popular claramente machistas, pues yo me niego. Son esas pequeñas piedras nel camín las que me van faciendo deconstruir las realidaes que yo mesma me creo, porque de lo que va l'asuntu ye d'alcontrase non solo emocionalmente dientro d'esa pulsión sinón a nivel de representación: yo soi caldín que ye colectivo pero tamién tengo qu'identificame y alcontrame nesa pulsión.

-¿La pandereta ye un instrumentu de poder?

-Una de las cosas que me fizo romper la dinámica foi dame cuenta que la xente que tocaba la pandereta conmigo allá pol 2010 nun se consideraban a sí mesmas músicas, entós eso fai un pequeñu crack. Pa mi la pandereta dientro'l contestu folklóricu yera sinónimu de poder porque la paisana que la tocaba, la mio mayestra, a golpe d'ella facía que' l mio cuerpu se moviere. Después cuando entro n'otros ámbitos voi sintiendo otras narrativas: ye un instrumentu menor porque la voz de la muyer hai que rescatala o dignificala, que yera dalgo que m'estallaba la cabeza porque nun entendia en qué momentu dexara de ser digno y ye que pa mi escuchar los discos de 'Muyeres' yeran ostias de mano abierta, emburriones colectivos que me daban.

-¿A lo postrero'l viaxe qué idees queden?

-Ta el constructu narrativu que se crea alrodiu la pandereta y al final acabo dándome cuenta que ye un simple instrumentu, que nun había porqué endiosalo, porque con una pandereta puede tocase cualquier cosa y pasa de ser un simple instrumentu pa crear mundos, eso ye colo que yo m'embeleso a lo llargo de tol llibru, porque puedo crear cualquier tipu d'historia alrodiu d'esto y voi cargala de pura potencia. Ye un istrumentu y el mas sencillu del mundu y con él puede facese un analísis casi xenealóxicu del desarrollu de la música tradicional asturiana nos útimos 30 ó 40 años Acabo pensando que no guapo que ye la heteroxeneidá de las respuestas que vamos alcontrar.

• Temas
• Alitar Asturies