Un homenaxe a la obra de Nel Amaro centra el programa de la Selmana de les Lletres

L'Auditoriu Teodoro Cuesta de Mieres acueye el prósimu llunes al meudía l'actu institucional nel que va presentase'l volume 'Pruebes d'autor. Les siete vides de Nel Amaro', una obra que recueye siete artículos sobre l'escritor y artista nel so contestu históricu, amás d'abondante material gráficu y que va entregase de baldre cola compra d'un llibru o discu n'asturianu el viernes 7 de mayu, Día de les Lletres. De siguío va proyectase'l documental realizáu a propósitu d'Amaro y inaugurase la esposición sobre la so vida y obra. Pela tarde, nel mesmu escenariu, la compañía Nun Tris va facer a les 19 hores la llectura dramatizada de la so pieza 'Antígona por exemplu'.

El martes nel salón d'actos del Hotel d'Asociaciones de La Pola L.lena va presentase a les 19 hores l'otru volume comemorativu de la 42 Selmana de les Lletres, una antoloxía lliteraria del escritor homenaxéau preparada por Xandru Fernández col títulu 'Esperté ensin patria pa dormir ensin pruyimientos de conciencia'. Nella úfrense diversos testos de la so obra narrativa, poética y dramatúrxica, ente ellos dalgunos inéditos. Darréu va entamase una Velada d'Arte n'Acción con perfomances de José Busto: 'Nel Amaro tuvo equí', Abel Loureda: 'Ven y vino', y d'Ánxel Nava: 'Muria perimetral'.

Les actividaes programaes pal miércoles 5 de mayu empobinen a Llaboral Centru d'Arte y Creación Industrial, onde se va inaugurar a les 12 hores la esposición 'Nel Amaro-Postal/ Visual', que podrá visitase hasta'l prósimu 26 de xuno. Esi mesmu día, a les 19 hores, va cellebrase na Casa de Cultura de As Figueiras (Castropol) un 'Homenaxe as nosa letras' cola presentación del llibru 'Al aveiro d'un trabatel. Úa escoyeta de poesía contemporánea en gallego-asturiano'.

El xueves, a les 19 hores nel Auditoriu Príncipe Felipe d'Uvieu, la OSPA, dirixida por Rubén Díez, va ufiertar el Conciertu de les Lletres Asturianes, col programa: 'Rapsodia asturiana' y 'Don Quijote y la batalla de los rebaños', entrambes de Leoncio Diéguez Marcos, amás de 'Bricial, poema sinfónico', de Guillermo Martínez.

El postrer actu programáu pola Conseyería de Cultura n'homenaxe a Nel Amaro va ser la sesta edición del concursu de microrellatos improvisaos pa xente mozo 'Entaína a escribir' el viernes 7 de mayu a les 18.30 hores en Llaboral Centru d'Arte. Esa mesma xornada cellébrase'l Día del Llibru n'Asturianu cola collaboracion d'alrodiu mediu centenar d'establecimientos de tola rexón qu'ufren un 10 % de descuentu en toles publicaciones y discos na nuestra llingua.