'Glaudius' y Bolado, los llibros regalu

Del tesoru pa tolos gustos llectores qu'ufierta la lliteratura na nuestra llingua, arriquecíu cada añu poles correspondientes novedaes editoriales, les llibreríes asturianes regalen güei cola compra d'un volume o d'un discu en cualaquier de los dos idiomes propios de la rexón, l'avezada publicación conmemorativa alrodiu la figura homenaxeada na Selmana de les Lletres Asturianes y esta edición, nel casu de los establecimientos asitiaos na zona del Navia-Eo, la sorpresa va ser el cómic 'Gladius' del nuestru ilustrador Neto del Castillo. Trátase d'una reedición n'eonaviego del tebéu que publicó en 2007 la editorial CH coles historietes protagonizaes por Gladius, un gladiador astur y pacifista del tiempu de los romanos al que'l dibuxante cangués diera vida nes páxines de la revista 'Tapón' y qu'agora remanez falando en gallego-asturiano.

El llibru regalu que s'ufre nel restu d'Asturies repasa la vida y la obra del escritor Xosé Bolado embaxo'l títulu 'Fálame duce' colos trabayos d'una docena d'amigos del homenaxeáu y espertos.

Lleguen asina les Lletres al so día grande que va tener a les 19 hores nel Teatru Campoamor l'actu institucional de l'Academia de la Llingua Asturiana y mañana sábadu al meudía la manifestación de la Xunta pola Defensa de la Llingua con salida na Estación del Norte d'Uviéu.

• Temas
• Alitar Asturies