«Los formes Ovetum y Ouetao espresaríen realidaes distintes»

X ulio Viejo (Uviéu, 1968) publica 'El nacimientu d'Ouetum' (Trabe), un estudiu dende la toponimia que busca echar lluz sobre los oríxenes de la capital d'Asturies y el so espaciu.

–¿Qué ufierta nesti trabayu?

–Elanteéme la investigación del tóponimu Uviéu, non centrándose solo na cuestión etimolóxica, sinón viendo'l contestu toponímicu en xeneral, cómo s'organiza l'espaciu y cómo se nomen les distintes partes reconocibles nesi espaciu. A partir d'ehí creo qu'eso podía echar dalgún tipu de lluz nuevo o ofrecer otra perspectiva sobre los oríxenes de la palabra, la ciudá y el territoriu.

–El filu del que tirar atopólu n'Ouetum y Ouetao, les dos formes documentaes.

–Ye difícil entender eses dos formes como variantes formales, ehí lo que tienes nuna respecto la otra ye una sílaba más y si la hai puedes entender que ye una formación morfolóxica distinta. Eso ya t'abre otres víes: primero que tas falando de realidaes distintes. Y per otru llau permítete xugar cola cronoloxía, presupón qu'hai una forma qu'espresa una realidá preesitente a la otra.

–La so hipótesis ye que Ouetao sería el cogollín urbanu y Ouetem, la forma previa, un espaciu más ampliu ¿Cómo llegó a ello?

–La identificación d'Ouetao col cogollín, l'Uviéu redondu, ye bastante evidente, sistemáticamente Ouetao refierse al entornu urbanu, mientres Ouetum puede referise al entornu urbanu y a tolo demás. La gran incógnita ye qué entra nesi 'tolo demás'.

–¿Qué dicen los documentos?

–Nel conceptu inicial d'Ouetum, parez que ye una contorna que básicamente coincide coles llendes del conceyu d'Uviéu, pero va más allá y hai documentación que nos diz que Les Regueres ye Uviéu, esa mención duplica'l territoriu y llévalu mui al occidente y a la oriella'l Nalón. Y tamién aparez otra documentación na que falen d'una entidá que se llamaba Llanera d'Uviéu y qu'inclúi Uviéu, Les Regueres, incluso dalgún puntu del actual conceyu de Llanera. Hai una conceptualización xeográfica arcaica, que se fue conformando probablemente enantes del periodu documental y que sería el puntu históricu útil pa tratar d'acutar qué podía ser esi Ouetum.

–¿Cuálu papel xueguen nesi espaciu los ríos y los valles?

–Si pañamos toa esa concepción amplia d'esi territoriu, Ouetum sobremanera l'interfluviu ente'l Nora y el Nalón, ehí van concentrase toa una serie de topónimos en -ubia: Cubia, Trubia, Pruvia que tienen una disposición arrodiando tolo que ye básicamente Uviéu.

–¿Y nel contestu históricu?

–Los valles fluviales configuren el trazáu de les víes romanes y nesti casu ye bastante fácil de siguir el trazáu de les principales víes qu'entren nel centru d'Asturies siguiendo'l cursu de los ríos y polo que nos interesa a nós en clave toponímica cómo se puede correlacionar uno con otro. Si pensamos nel ramal de La Mesa qu'entra pela zona de Cubia o en Trubia d'Uviéu y tienes otru Trubia a la entrada en Xixón dende la parroquia de Pruvia en Llanera. Hai una coherencia ente la distribución toponímica d'eses formes en -ubia, la rede hídrica y lo que no diz l'arqueoloxía y la historia sobre les víes de comunicación romanes.

• Temas
• Alitar Asturies