«Fontoria fai la música que quier»

'Sirio' ye'l nome del tercer trabayu discográficu de Fontoria, un ambiciosu y singular xiru de tuerca al llabor amosáu en 'Nordés' (2019) y 'El máxicu viaxe de Fionna de Morlay'(2020) nel que la banda piloñeta formada por Maxi Areñes, Pablo Pumarada, Xosé Ramón 'Navia' y Nagore Goikolea arródiase de les colaboraciones de Susana Gudín, Pablo Canalís o David Fernández, ente otros. Areñes, vocalista y compositor, fálanos d'él.

-¿Por qué 'Sirio'?

-Quiximos xugar col nome de la estrella y el del perru del cazador Orión de la mitoloxía, una historia que me fascinó dende neñu y que ta presente en sinfinidá de cultures.

-Ye un álbum doble, ¿qué ufierten nél?

-El discu 1 ye un tema instrumental de 74 minutos pa escuchar d'un tirón. Hai nél lo que nos presta facer, muncha experimentación siempre alrodiu la música raíz de munchos sitios y nesa amalgama hai dende rock progresivu, folk de fondu básicu, música clásica, lírica, electrónica. Nel otru discu, van alcontrase pieces escoceses, irlandeses, de Bretaña sobremanera y temes asturianos con composiciones na nuestra llingua. La xente va atopar abondes sorpreses y coses chules, tanto pa mover la patura como pa pensalo un puquiñino.

-¿Qué tien en común y en que s'estrema de los trabayos anteriores?

-Lo común ye'l soníu que nos identifica. Póneslu y dices: «Son Fontoria», ye la suerte que tenemos. Y si bien el segundu discu 'El máxicu viaxe de Fionna de Morlay' foi mui complexu, y grabáu na pandemia, esti ye tovía más. Había que trabayar colos músicos na distancia y son pieces instrumentales que camuden muncho dende la idea primixenia al resultáu final: dábanos pa facer cinco discos y decidimos grabar ún doble. Después del CD 1, llegar al segundu, foi un trabayu enorme, sobre tou a la hora d'elexir. Si vas meter pieces d'Escocia, que nun sea lo típico: 'La danza l'osu', que ye de 1º de Celta (rises). Pa mi a veces ye más difícil escoyer un d'esos temas que componer.

-¿Considérense una rara avis na música asturiana?

-Hai coses que debieren tar penriba les etiquetes. Somos un grupu folk porque facemos música de raíz, otra cosa ye lo que la xente entienda nesa clasificación. Nun tamos de moda nin vamos a talo enxamás y esa ye la nuestra meyor ventaya. Facemos la música que queremos, la de Fontoria. Les modes pasen, tienen ciclos, son orquestaes y beneficien a cuatro, a mi interésame levantame vivu mañana. Hai coses coles que toi d'alcuerdu con cambios que se tan produciendo agora, pero hai que saber facer los cambios, nun val tou, hai que cribar mui bien. Ye verdá qu'hai una llinia trazada, como diz el cantar, pero nun val solo que tea trazada, tien que ser duradera.

-Al empar sigue a escribir los sos 'cuentinos', tamién raru na so apuesta pol humor popular.

-Nun ye fácil sin cayer no obvio y na socarronería de chigre, como se ve a veces nes redes sociales. Nel mio casu según vas cumpliendo años daste cuenta de qu'hai munchu castrón, tantos como idiotes y dalgunos son les dos coses. Al través de los cuentos, poder utilizar la fábula -onde yo vivo ves gatos, pegues, etc.- y dar dalguna mocada a quien la merez, déxame mui relaxáu, dame igual que nun pillen el mensaxe.

-El debate de la oficialidá ¿da pa tomalo a cuentu risa?

-Una llingua pa que nun muerra lo primero ye falala y la oficialidá ye un drechu a que yo pueda espresame en cauces oficiales, namás. Hai muncha llenda negra: en Galicia úsase el gallego y nun veo a naide escontra. Equí creo que ta too demasiao politizao y preste más o menos, una llingua ye'l mayor tesoru que tien un pueblu.

• Temas
• Alitar Asturies