«Esti ye el discu más 'pa mi' y más personal de tolos que fixe»

Del títulu y el sentíu d'esti álbum, Areñes revela que «ye mui autobiográficu, la historia d'un neñu que ta malu, postráu na cama del so cuartu y la única distración que tien el probe ye pela nueche asomase al ventanucu que tien na habitacionina y ponese a cuntar estrelles. Entámalo una y otra vez, y dase cuenta un día, después de munchu tiempu, que había cuntáoles toes. A la vez, a midida que diba medrando, veía que la xente yeren como xirasoles, diben toos na mesma dirección, gachaben toos la cabeza lo mesmo y él decidió que cuando fuere mayor nun quería ser un xirasol, diba ser un xiralluna». Y preguntáu por cuánto d'esi neñu hai nel Maxi Areñes que güei compón discos bien al so aire, nun dubia n'espresar que «tien munchísimo que ver conmigo. Agora que fálase tanto -y al empar tan bien poco- del 'bullying', a mí abrasáronme. Cuando yes un neñu sensible pa dalgunes coses el to mundiu interior ye riquísimu y la vía d'escape que yo tenía –amás de cuntar estrelles– yera la música. Sigue siendo asina» y afita que «al final, esa parte que dicen que nos queda daquello, nel mio casu ye tovía la d'un neñu mui acosáu y a lo meyor d'ehí sal tanta creatividá cola música. Ye la mio manera de siguir cuntando estrelles».

Nesi sen aporfia en definir esti trabayu como «probablemente lo más personal de tolo que fixi. Como tengo dicho más d'una vez, yo nun faigo música pa naide, fáigolo por soltalo de dientro y básicamente pa min. Pos, aunque suene un poco raru, esti ye'l discu más pa mí de toos». El repertoriu qu'aparez nél, caltién, ye l'amuesa más apalpable d'esa autoafirmación: «Hay un tema instrumental llargu que lleva'l títulu del discu, después varios otros cortes instrumentales y namás ún vocal, y too tien rellación coles mios coses y les mios aficiones. Por exemplu hai un tema que se llama 'Air Pockets', les bolses d'aire que nomamos torbolencies cuando vamos n'avión, y ye porque soi un fanáticu de l'aviación, apasióname volar pel mediu que sea. Hai otru que se titula 'L'espresu xiralluna', polo que cuntaba enantes: ye too mui personal, a casufechu, pero como a la fin ye sentir música, tampoco tien problema».

Igual de personalísima ye la variedá d'estilos de 'El neñu que cuntó toles estrelles', nel que'l músicu piloñés desvela qu'hai dende jazz puru a una versión de 'Amazing Grace' con harmoniu y lap steel. Areñes ye'l responsable de tola instrumentación y cuenta coles collaboraciones del arpista catalán Josep Maria Ribelles, amás de la canguesa Vero Rubio na trompeta y trompa.

«Permitime lo que vengo faciendo los últimos años que ye básicamente, lo que me petez. Fuxir de la pregunta: ¿esto ye folk, rock..? Non, ye música», sentencia. Barrunta que-y prestara presentalu nel país, inda nun-y quita'l sueñu mientres tenta cuadrar una xira per Cataluña, Francia y Alemania.