«Sin la escuela nun hai futuru pa la llingua»

«Ye un regalu y una ayalga prestosísimos, que nun esperaba a estes altures», afirma'l responsable d'esta aventura pedagóxica y musical qu'a lo llargo de cuasi dos déquedes grabó ocho discos y pela que pasaron les voces de cásique doscientos escolinos nes distintes fornaes. Xubiláu de la docencia va trece años, Nacho Fonseca remembra cómo escomenzó too nel cursu 85-86 na escuela de Porrúa (Llanes) onde ponía clas. El cursu anterior, el gobiernu del Principáu entamaba una esperiencia piloto en seis centros pa introducir la llingua de manera voluntaria y al siguiente, enanchó la ufierta a otros colexos. La escuela porruana foi ún d'ellos. Fonseca resalta que daquella «nun cuntábamos con nengún material didácticu. Un grupu de compañeros axuntábamonos dellos fines de selmana en Perlora, no que llamábemos 'perloraes' y neses reuniones caún aportaba coses que pudieren valir pa les clases d'asturianu. Unos obrines de teatru, otros poemes y yo, que siempre me gustó la música, pensé que podía aportar cantares senciellos pensaos pa los escolinos.». Los primeros nacieron nel aula de Porrúa: «Tenía unos 17 críos y d'esos, 14 ó 15 cantaben bien. Pensé nel interés pa cualquier llingua na escuela l'usu de cantares neses primeres edaes y asina fueron saliendo 'La moto de Pachín', 'El Cañicón' y el restu», desplica.

El puxu definitivu diba llegar cuando decidió preparar col so coriquín unos cuantos cantares y presentalos nun alcuentru de colexos al qu'asistía l'entós delegáu del MEC n'Asturies, Antonio Trevín y el presidente autonómicu, Pedro de Silva. «Al acabar, Trevín y De Silva, felicítáronme, dixéronme que-y prestara muncho. Taba ellí Lisardo Lombardía, que yera sociu de la Fonográfica Asturiana y encamentáronme que preparare más cantares pa sacar un discu. Daquella yera dalgo que namás taba al algame de Victor Manuel, Nuberu o Ilegales. Que lo ficieran unos neños d'una escuela de pueblu, dalgo fuera de lo común». Asina aparecía 'Seliquín' (SFA, 1986) producíu por Pedro Bastarrica y Rene de Copaud. El discu tuvo una acoyida igual d'estraordinaria que les circunstancies nes que s'asoleyó.

Nel cursu siguiente, Fonseca y la so muyer, tamién docente, treslladáronse a Lieres pa poner clas nel so colexu y ehí llegó otra vuelta'l brinde de Lombardía pa preparar un discu nuevu, el primeru de 'Xentiquina' (Fonoastur, 1987). Entamaba asina un proyectu del que diben salir seis discos más y un repertoriu que ye parte ya de la nuestra música popular pa grandes y piquiñinos. En 2012 bandes y artistes de tola escena asturiana grababen un tributu al coru infantil: 'Xentiquina Crew' y el colexu de Lieres onde nació lleva güei el nome del grupu. El so creador, con tres fíos docentes y el mesmu compromisu col asturianu sigue mui de cerca la so situación na enseñanza: «Avanzóse muncho pero sigue siendo la cenicienta y tamién nes condiciones llaborales de los docentes. La escuela ye fundamental pa la tresmisión de la llingua, si falla eso, nun hai futuru posible», asegura.