«Unos cuatreros aprovecharon la llucha d'un sieglu p'acabar con too»

-Na mesma clave d'humor que ta puestu'l títulu ¿ye ésta una especie de guía del paisaxe humanu de les cuenques?

-El llibru trata del viaxe d'una investigadora norteamericana al Mieres de 2001 y diba titulase 'La casta de los prexubilaos de Les Cuenques mineres asturianes' como'l trabayu qu'ella publica en National Geographic y pol que-y van dar un premiu. La fecha nun ye casual, en 2001 salta'l Casu Campelo y munchos danse cuenta que lo que ta ocurriendo nes cuenques ye una tomadura de pelo por parte de los sindicatos mineros. La historia acaba en 2018, col xuiciu de Villa, onde se confirma que la tomadura de pelo ye a la xusticia y a Asturies en xeneral.

-¿Cómo ye la realidá qu'atopa la protagonista?

-Empleo a una antropóloga americana, Eleonnor Windstone, que fala col padre al través de emails. Él lluchó coles Brigaes Internacionales y tien una visión idílica d'Asturies y de la República Española, tien esi pensamientu d'un sindicalismu que lluchaba por unos derechos y contra una dictadura. Too eso desaparez nos 80, cuando los sindicatos mineros creen la chequera pa dir tomando'l poder lo más vago ya inútil de les cuenques y unos dirixentes que namás busquen tener alredor una banda de llambeculos capaces de lo que seya con tal de nun volver a trabayar na mina. Esa ye la esencia de la historia, como esos cuatreros acabaron con esa historia de llucha y con too.

-Una historia negra como'l carbón...

-Mui negra. Nesi viaxe Eleonnor atópase con esa Mieres d'a primeros de los 2000, tol día lloviendo. A ella da-y la impresión de tar nel Bronx o nel Chicago del que-y fala el padre, cuando los sindicatos s'acaben convirtiendo nuna mafia y tien la sensación dende'l principiu que la tan siguiendo unos paisanos de bigote, chupa de cueru, l'uniforme oficial de los sindicaleros d'esa época, y que tenten fáce-y dalgo. Siéntese tan persiguida qu'acaba marchando.

-Sicasí, envede'l thriller, usté valse de la sátira pa contalo, como fizo en 'La boda del añu'.

-La situación que se describe ye mui triste, a la que s'abocó a les cuenques y na qu'esos dirixentes nefastos, colos que teníen alredor, prefirieron vendese a lluchar como ficieron los padres, los güelos y xeneraciones anteriores. Empleo los mesmos rexistros y la mesma forma d'escribir que en 'La Boda del Añu' porque nun dexa de ser la descripción d'un esperpentu, y nun dexa de ser bono, en fondo, acabar riéndose un poco de nosotros mesmos y tamién d'ellos, por más que fueran los que durante munchos años tuvieron la posibilidá de reise de toos nosotros. Y la meyor forma de contalo pa nun caer na tristeza más profunda, ye contándolo como una astracanada.

-Nos últimos tiempos hai toa una lliteratura alrodiu la memoria de la minería: Aitana Castaño, Noemi Sabugal ¿qué opinión-y merez?

-Esos llibros que cites parécenme magníficos. Nunca debemos escaecer la llucha de toa esa xente, homes y muyeres a los que-yos tocó los peores tiempos y el sacar alantre unes reivindicaciones absolutamente necesaries. Yo doi un pasu más y voi a la xeneración siguiente, la nuestra, que nun tuvieron más xusticia qu'un xuiciu de chiste como'l que tuvo Villa y poco más. Vimos a una xeneración entera xubilase con 40-45 años, cómo se facíen obres faraóniques que nun servíen pa nada y cómo se compraba a la xente: güei los sos fíos y nietos tán nel paru o fuera d'Asturies. Creo que ye absolutamente necesario que siga habiendo esa reivindicación de la nuestra identidá y como parte d'ella la vinculada a la minería, pero tampoco debemos escaecer lo que fixieron esos cuatreros col so xefe a la cabeza aprovechándose d'esa llucha de más de 100 años.

-La so narrativa avérase casi siempre al presente y al realismu cotidianu, ¿ye esi l'espaciu onde se siente más gustosu?

-Siempre me gustó lo cotidiano. Interrelaciono'l presente cola realidá y con sitios cercanos pa que la xente vea que tolo lo que toi contando en fondo nun dexa de ser una historia real. Tengo amás la bendita suerte de que nun escribo pa la posteridá sinón pal presente. Nun son histories pa lleer dientro de muncho, namás que'l que lo pueda mirar como un historiador piense: «Mira'l payasu esti qu'escribió una historia de risa nun tiempu tan triste».