Conceyu Bable, cincuenta años xorreciendo la llingua

Alrodiu de la importancia histórica de Conceyu (una entidá a la que tamién va tar dedicada la 45 Selmana de les Lletres) pronuncióse'l xefe del executivu asturianu con palabres d'eloxu y tamién de proyección nel momentu presente. «Ye un placer tar equí güei nesti reconocimientu del conxuntu de la sociedá al que se suma el gobiernu del Principáu a Conceyu Bable polo que representó de tresgresos naquel momentu nel qu'había munches oportunidaes de cambios n'Asturies. Hai que facer una reconocencia global a tolos homes y muyeres d'esta tierra que fueron claves pal emponderamientu de la nuestra llingua con un xestu de gratitú», afirmó Barbón pa añadir de siguío: «Y quiero llanzar una reflexón al conxuntu de los grupos parllamentarios de la Xunta Xeneral de que'l meyor reconocimientu que se puede facer ye precisamente aprobar la oficialidá del asturianu y del eonaviegu. Tolo demás, son caxigalines, que diría mio güela».

El presidente de l'Academia, Xosé Antón González Riaño, remembró que va agora cincuenta años, el colectivu del que él mesmu formó parte «reivindicaba la dignificación de la llingua y la cultura asturianes. Entós tovía vivía Franco y Conceyu reivindicaba tamién el llogru de les llibertaes democrátiques. Daquella nun yera pensable qu'Asturies fuere una comunidá autónoma y ya se pidía esa entidá política p'Asturies pa solucionar los problemes que ya se taben viendo. Representaba una visión tresversal del futuru qu'en parte llogróse y en parte non. Polo tanto hai qu'analizar críticamente lo llograo y siguir afondando no meyor d'Asturies como comunidá política con nueves posibilidaes de desarrollu, incluíu l'económicu y como identidá llingüística y cultural». La principal asignatura pendiente, resaltó «ye el cumplimientu del artículu 3.2 de la Constitucion, la dignificación del asturianu como llingua oficial», declaró.

Del legáu de Conceyu Bable González Riaño quiso sorrayar «la so visión tresversal, ye dicir que'l progresu d'Asturies, el reconocimientu de la so llingua y cultura, ye una cuestión tresversal. Tanto l'asturianu y l'eonaviegu como la nuestra cultura tienen que tar al marxe d'ideoloxíes o d'estratexes polítiques concretes, porque son un bien social d'Asturies. Esa tresversalidá tamién ye herencia de Conceyu Bable», afirmó.

A lo llargo de la xornada Marcos Rodríguez espunxo la función del sistema educativu na recuperación de la llingua, Pilar Fidalgo l'apueste pola lliteratura dende Conceyu y Miguel Solís la so esperiencia nel movimientu dende Avilés. Xaime Martínez y La Familia Tradicional punxeron el pieslle a con un conciertu nel que revisitaron temes emblemáticos del Nueu Canciu Astur.