Blanca Fernández fraña'l techu de cristal de la novela n'asturianu

Fernández, graduada n'Estudios Clásicos y Románicos con Minor d'Asturianu, xune'l so nome al de les otres dos novelistes con obra publicada na lliteratura contemporánea en llingua asturiana: Esther Prieto, ganadora ex aequo del Premiu Xosefa Xovellanos nel 2001 con 'Güelu Ismail', y Berta Piñán, que llogró'l mesmu gallardón en 2017 col so relatu 'Como la muda al sol d'una llagartesa'. La escasa presencia de muyeres na nuestra novelística ye, ensin dulda, una anomalía que contrasta col pesu bien significativu que caltienen en xéneros como'l de la poesía o l'ensayu filolóxicu y abulta una peculiar paradoxa si tenemos en cuenta que'l primer relatu llargu en prosa n'asturianu -'El viaxe de tío Pacho 'El Sordu' a Uviedo'- escribiólu una narradora, la ribesellana Enriqueta González Rubín (1832-1877).

Imprentada en 1875 y desaparecía hasta'l so afayu en 2007, la novelina de González Rubín marca un sitiu resaltable na construcción de xenealoxíes na lliteratura asturiana. Con ella prosigue'l filu de la tradición entamada por Marirreguera y enllaza a la obra de la pionera Xosefa Xovellanos, cola qu'arriendes guarda más d'un paralelismu biográficu. El siguiente esllabón no que cinca a la narrativa llonga va tener d'esperar mas d'un sieglu y cuartu hasta la publicación de la primer novela femenina del Surdimientu con Esther Prieto. En 'Güelu Ismail', l'acción treslládanos a la Palestina d'empiezos el sieglu XX hasta l'ésodu provocáu pola creación del estáu d'Israel, un escenariu bien estremáu al del 'Viaxe del Tíu Pacho'. Tamién rigorosamente moderna va ser 'Como la muda al sol d'una llagartesa' de Piñán, un thriller rural protagonizáu por una muyer urbana que supón la incursión de la escritora de Cañu nel xéneru negru.

'Trovadoresca', el títulu col que Blanca Fernández consiguió'l Premiu Radagast, ye definida pola so autora como un relatu «de fantasía urbana, ambientada na so mayor parte n'Uviéu na década de los 2000». Un trovador medieval remanez en plenu sieglu XXI pa canta-y a la protagonista, Dora, una maldición familiar que vienen heriedando les muyeres de la so estirpe dende tiempu inmemorial. La investigación del orixe del conxuru y cómo llibrase d'él cuerre en paralelo a otru descubrimientu relacionáu con esi bardu llegáu d'otres dómines y que puede cambiar toles teoríes lliteraries y llingüístiques afitaes alrodiu la hestoria del idioma asturianu. La narradora yerbata desplica que la trama «escomecéla como relatu va más de diez años, pero daquella nun tenía el conocimientu y la formación como pa escribila con un ciertu sentí una so parte llingüística y lliteraria. Va tres o cuatro años retomélo, fice una primera versión, vi que fallaben delles coses y volví refacela. Di-y remate na cuarentena del andanciu, prácticamente al empar que terminaba la otra novela». Na inspiración de la primera, desvela que «siempre me ficieron muncha gracia películes del tipu 'Dos colgados en Chicago', con xente que vien del pasáu y vense col choque de nun saber ónde tán y qué facer. Tien esa parte d'humor, inda l'argumentu seya bien otru».

Fernández resalta que 'Trovadoresca', amás de somorguiase no fantástico derrompe otres faces novedoses na nuestra lliteratura, como la inclusión de personaxes LGTB: «Nun hai munchos exemplos, doime cuenta cuando me pongo a buscalos pa los mios alumnos, y nesta hestoria punxi un enfotu personal en qu'aparecieran hasta'l puntu que nun s'entendería ensin los personaxes LGTB qu'hai, tán mui pegaos a la mesma trama». La novela, cuenta que podrá tar nes llibreríes a final d'añu. Enantes, pa mayu, Radagast va publicar 'L'home de les caparines', que l'autora defín como «una hestoria ente realismu máxicu y terror», tamién con protagonismu femenín. El mesmu que fala na novela asturiana: «Ye un problema, tol mundu lo sabe pero nun se soluciona. Pa que cambie somos nós les que tenemos de dar el pasu. Si esti premiu val pa qu'otres muyeres s'animen a publicar, taría encantadísima, porque fai falta», allampia.