Nel Amaro, versu llibre del surdimientu

Xandru Fernández, coordinador de la cellebración y amigu personal d'Amaro, caltién qu'esta reconocencia institucional ye un pasu pa recuperar l'interés por un autor «que va dir medrando porque dexó un posu importante que-y reconocen les xeneraciones más moces y nesi sen, debía afalar a una nueva edición posada y revisada de los sos testos, sobremanera les noveles, publicaes nel so día con abondo descuriu». Una preba de la trescendencia del so llabor creativu, afirma tar confirmándola na preparación d'esta Selmana de les Lletres «con respuestes que nos lleguen de Portugal, Catalunya y de tol estáu, onde la so obra ye una referencia de l'arte d'acción contemporáneu y de la cultura underground desenvuelta dende los 70-80», desplica.

L'activismu cultural de Nel Amaro principiara tiempu atrás nel ámbitu del teatru, de mano como actor y después como director en grupos aficionaos de la Cuenca'l Caudal. Escomenzó al empar a escribir les sos primeres obres, como la versión en castellano de 'Antígona, por exemplu' y en 1978 remata n'asturianu 'Xénesis'. Funda revistes lliteraries como 'El Sapiens' o 'Cuélebre Literario' y ta presente como poeta n'antoloxía de nuevos autores publicada pol Seminariu de Llingua Asturiana nos sos Estudios y Trabayos, onde presenta la comunicación: «Per qué entamamos una nuea poética ena llingua asturiana», nel que defende qu'ésta «non-y da el espaldar a la rialidá, lo cualo dixébrala de la vieya poesía ena mesma llingua».

Sicasí, Amaro, foi una especie de versu sueltu d'esa primer xeneración del Surdimientu, como reconoz Xandru Fernández: «Al lleelu agora nesi contestu parez evidente qu'él ta a tresmano, la suya ye otra poética. Alcuérdome d'un artículu qu'escribió tiempu después Sánchez Vicente nel que reconoz el ciertu despreciu col que lu trató la xeneración de Conceyu Bable, admitiendo esi enquívocu y asitiándolu como una de les voces más importantes del so tiempu n'Asturies». El periodu nel que va publicar la mayor parte de la so obra n'asturianu, los sos llibros de poemes, relatos y les sos cinco noveles, coincide coles engarradielles lliteraries de finales de los 80 y los 90, y ello tampoco favorez l'acoyida d'una obra como la suya enfocada a la ruptura vanguardista. La so evolución posterior dica la poesía visual o les perfomances, foi una salida natural: «Llega un momentu que se da cuenta que na creación lliteraria en sen más clásicu nun puede avanzar per ella. Él entiende que l'arte tien de ser dalgo social, público, y tira a lo visual, onde la voz seya más gritu que un testu adornáu pa disfrutar cuatro nun cenáculu». Esi gritu sigue llamando l'atención y despertando la reflexión crítica nuna obra qu'una década después del pasamientu del so autor, ta más viva que nunca.