«Préstanos facer una música potente y fresca»

El panorama de la música tradicional asturiana sigue medrando al pesar de les dificultaes d'espoxigue coles que d'avezu s'alcuentra y arriqueciéndose con nueves aportaciones. Ye'l casu del que va ser el primer discu de llarga duración d'una formación moza, en cuantes a la edá de los sos componentes y tamien a la so vocación anovadora como artistes, pero que cuenta ya con diez años d'andadura: Alienda. Con base en La Villa, entama en 2013 y un añu después asoleya'l so EP 'Alendando', con cuatro cortes, algamando'l Premiu Amas a la meyor canción folk pol tema 'Rucaúres'. D'entós p'acá, el grupu tien vivío dellos cambios ente los sos componentes y anguaño ta integráu por Illán Escalera Martínez (Banda de Gaites El Gaitero de Villaviciosa) a la gaita y voz; Francisco Rodríguez Buznego, al bouzuki; Carlos Castro Vázquez, nel baxu; Edu Llosa García, batería y percusiones (director de Banda de Gaites El Gaitero y batería de La Tarrancha); Emilio Amboage Rodríguez (Banda de Gaites El Gumial) a la guitarra; y Bárbara González-Quevedo Pedrayes (colectivu Muyeres), voz y vigulín.

El discu grabóse nos Estudios Tutu de Corvera y, pal so llanzamientu, la banda maliayesa tien entamao una campaña de micromecenalgu cola que cuenten cubrir los costes de la impresión del trabayu y el so material de merchandising. L'oxetivu ye algamar a los 3.300 euros pal 2 d'abril, la data fixada pal fin de campaña y, si se cumple, poder presentar l'álbum nun conciertu el prósimu 30 d'abril nel Teatru Riera de La Villa. Dende esi día va poder mercase físicamente el Llp que lleva como títulu'l nome de la banda y sentise nes principales plataformes dixitales. La vigulinista y cantante del grupu describe el conteníu de la obra como «un conxuntu de doce temes. Dalgunos ya nos llevaben acompañando unos cuantos años y ya los tocábamos per ehí pero nun taben grabaos, el restu son totalmente nuevos. Hailos tradicionales arreglaos por nosotros, pero la mayoría son de composición propia. En cuantes a les lletres, delles son igualmente tradicionales, una ye del cantautor Alfredo González y otra del nuestru 'lletrista oficial', que ye Roberto González-Quevedo, mio padre», desplica.

L'últimu cantar al qu'alude la componente d'Alienda ye 'Zanca de cabra' y xunto al instrumental 'Rozaes' son los únicos que se conocen pel momentu, inda nes próximes selmanes la banda tien pensao difundir otru tema nuevu. En cuantes al soníu qu'ufierten nesti trabayu, González-Quevedo apunta: «Caracterizámonos por facer una música potente, con fuerza y fresca, eso mesmo ye lo que nos presta tresmitir. Nel so día una revista calificónos como power folk y gustónos. Parezme que reflexa la enerxía que allampiamos treslladar». Orixinales y con sellu propiu, los maliayeses nun escuenden les sos referencies: «Somos mui fans de los grupos tradicionales asturianos, sobre tou de los tres ya míticos: Llan de Cubel, Felpeyu y Corquiéu. Ehí coincidimos toos en que nos encanten. Al llau d'esa influyencia, caún escuchamos una gran variedá de música, tanto de folk como d'otros xéneros», revela.

Alienda busca nos sos temes, en palabres de la so vigulinista y cantante, «llograr que lo que ta nel discu seya lo que podemos defender en directu, que ye lo que más nos presta col contactu del públicu. Por eso nel trabayu grabáu nun hai instrumentos de más nin nada que nun vaya correspondese colo que tocamos en vivo», afirma. Nesi sen, amás del conciertu de presentación del álbum en la Villa, cuenten poder rodalu n'otres actuaciones previstes pal branu.

Alrodiu del presente y futuru de la escena musical con raigaños na nuestra tradición, González-Quevedo señala que «el covid fexo munchu dañu en xeneral, pero parez qu'hai un resurdimientu, hebo dellos discos que salieron y otros que van asoleyase prósimamente, con grupos nuevos como Guieldu o míticos como Corquiéu. Quiciabes nun teamos nel meyor momentu pero hai que tar ehí pa puxar por ello». La integrante d'Alienda ve tamién con enfotu «la esistencia de propuestes novedoses como Llevólu'l Sumiciu o grupos de panderetes como Algaire. Hai movimientu, lo que nun hai son perres (rises) y falta tamién apoyu, pero la nuestra música ta mui viva», resume.

• Temas
• Alitar Asturies