«Quixi recuperar el tópicu medieval de la rellación afectiva ente dos homes»

Ganador l'añu pasáu del Premiu Enriqueta González Rubín de narrativa xoven cola so obra '1929', el morcinegu Andrés Fernández (Argame, 2003) ta acabante publicar la so segunda novela: 'El cantar de Suaro Caínez' (Radagast), una historia de fantasía épica qu'allampia por actualizar el tópicu medieval de l'amistá ente caballeros dexando abierta a la imaxinación de los llectores la verdadera naturaleza d'esa relación ente pares xuníos por un mesmu enfotu de combatir les fuerces del mal. Nobles, fidalgos y guerreros desfilen peles páxines d'una trama qu'esparde l'aliendu bélicu a los seres del otru llau de la biesca y del cordal: mouros, cuélebres, lloberos, xanes o güercos, una nación entera de personaxes que s'amarren ente'l puxu de la espada y la pasión de los afectos o la llealtá.

Mientres prepara nel so llugar natal un de los últimos esámenes del cursu, l'escritor y estudiante de Filoloxía Románica, desvela con procuru delles claves de la novela nueva, escrita cásique en paralelo a la que-y valió l'últimu premiu González Rubín y que como ella o el so debú lliterariu: '1809. Cartes de la revolución de Trubia' (Radagast, 2022), tien muncho tamién de viaxe nel tiempu. Y si nes sos anteriores obres la ficción empobinaba a los díes que siguieron a la Francesada y al llevantamientu del 25 de Mayu, o al contestu previu a la II República y a la Revolución del 34, agora somórguiase nes solombres de l'Asturies del medievu pa construir un relatu nel que'l posu verídicu de les batalles narraes nos cantares de xesta comparte espaciu coles aventures fantástiques protagonizaes por seres del tresmundu. «L'acción treslládanos a un reinu medieval asturianu al qu'amenaza otru reinu del sur, de metanes hai un conflictu tamién ente nobles y fidalgos que tenten aprovechar los invasores pa conquistar Asturies. Los protagonistes son Suaro y Roldán, dos caballeros que caltienen una relación afectiva mui fonda ente ellos y que tenten lluchar tanto contra la tiranía como contra la invasión. Esi ye básicamente l'argumentu que va desenvolviéndose en dos planos narrativos: ún contáu en primer persona por Suaro y otru por un cronista anónimu. La historia ye la mesma pero aparez distinta en caúna d'entrambes versiones», desplica.

Quiciabes l'elementu más novedosu d'esta trama de fantasía épica ye'l singular venceyu que xune a los dos protagonistes principales. Fernández apunta que «Suaro y Roldán caltienen una amistá mui intensa. Ye dalgo qu'aparez nos cantares medievales de xesta, la figura d'una pareya heroica xunida por una relación afectiva y d'amistá, pero que non necesariamente tien una impliación sexual, polo menos aparente. Parecíóme guapo recuperar esi tópicu medieval del llazu afectivu ente dos homes que ta bastane escaecíu». L'escritor ye consciente de que l'ambigüedá puesta na relación de los dos personaxes protagonistes ye suceptible d'interpretase en clave actual, inda matiza: «Tenté actualizar el tópicu de l'amistá ente caballeros y supongo que dalguien puede interpretalo como una pareya homosexual. El llector puede lleelo na clave que quiera porque esi calter ambigu esiste, pero nun foi dalgo premeditao, nun yera la mio intención, a diferencia de la novela de '1929', onde hai claramente una relación sexual ente dos homes. Equí si hai dalgo que se puede pescudar ta tamizao, nun se ve».

Otru cariz anovador ye'l tratamientu de los seres estraíos de la mitoloxía tradicional asturiana: «Siempre defendí qu'Asturies podía tener un potencial mui fuerte pa facer lliteratura fantástica con esos personaxes y tuvi esplorando bastante esi tema. Lo que noto ye que cuando s'usen inténtase sacalos del so contestu, l'ámbitu propiu onde habiten. Nesta novela quixi asitialos nun marcu afayadizu: el monte, la biesca o la xana venceyada siempre al agua», revela l'autor morciniegu, que trabaya anguaño nun nuevu proyectu narrativu del que de momento nun quier adelantrar nada.

• Temas
• Alitar Asturies