A la puerta d'una seronda cargada de llibros nuevos

La biblioteca universal de la llingua asturiana -como la infinita de Babel que suañó Borges- va medrando y arriqueciendo con títulos nuevos a midida que'l calendariu del tiempu estrena fueyes, dexando cayer les que ya pasaron. Y la collecha de seronda vien cargada de novedaes que traen aire frescu a les nuestres lletres con obres pa tolos gustos llectores. Confírmase tamién la tendencia de les últimes temporaes na que cada vez tien más pesu la narrativa, con predominiu de les noveles y les traducciones, al empar que xéneros como la poesía o l'infantil-xuvenil caltienen el so nichu bien acutáu y otros como l'ensayu escomiencen afitar un camín propiu.

Ente los primeros títulos n'abrir pasu pa dexase ver resalta la segunda edición de 'Suenos cunqueiros' (La Guarida del Cunqueiru), un llibru bien prestosu de poesía popular escrita na variante de la tierra tixileira de Degaña por Rosa Menéndez Rodríguez, l'artesana y emprendedora rural Rosa Cunqueira, que na entrega d'anguañu preséntase con forma de audiollibru pa sentir los versos na so mesma voz. Xunta él, Cuatro Gotes Producciones publica 'El cartafueyu d'alquimia', la novelina de maxa y fantasía cola que Blanca Fernández Quintana algamó'l XV Premiu Xosefa Canellada de Lliteratura Infantil y Xuvenil.

Los xéneros de la imaxinación son el campu lliterariu nel qu'apuesta la editorial Radagast que nestes dates ufierta a los escaparates de les llibreríes títulos como 'La vieya' d'Aique Fernandi, gallardonada col caberu premiu de narrativa entamáu pola editorial. Al so llau xúntense obres como 'La bastarda de Pelayu', de Xon de la Campa, l'antoloxía de relatos fantásticos 'L'horru de vapor', con pieces d'una docena d'autores actuales y la versión asturiana que firma Vïctor Suárez de 'James y el piescu xigante', del británicu Roald Dahl.

El sellu Impronta ta acabante asoleyar 'Oi, que dice mamá que volvas', I Premio de Poesía Ría del Eo, del bualés Miguel Rodríguez Monteavaro nuna edición billingüe gallego-asturiano/inglés, una apuesta pola espresión lírica que vien a xuntase a otru de los sos títulos recientes: 'Cuatro gatos', nel que cuatro poetes que d'avezu se manden del castellán: José Luis Argüelles, César Iglesias, Jordi Doce y Fernando Menéndez, enverédense equí al xuegu de los aforismos na nuestra llingua. Nel terrén de la novela, preséntase '1929', la obra cola qu'Andrés Fernández Menéndez llogró l'Enriqueta González Rubín de lliteratura mozo y otros dos títulos con lloréu d'un de los autores más prolíficos del panorama asturianu, Gonzalo G. Barreñada, que trai de la mano 'La guerra del Medrosu' (Premiu Andrés Solar) y 'El viaxe del cacique' (Premiu Xosefa Xovellanos). Nel ensayu, el periodista Damián Barreiro firma 'Asturiana kitsch', col que llogró'l Premiu Fuertes Acevedo. Gallardonáu tamién -nesti casu col Alfonso Iglesias de cómic- ve la lluz 'Ana María, la llobera d'Asturies' de Guillermo Menéndez Quirós y nel escaparatín de les lletres pa la xente menudo escamplen los cuentos de los hermanos Grim 'Los músicos de Bremen' y 'El xastrín valiente', illustraos por David G. Ferrero y María Perera.

A la fin, otru sellu bien activu, Trabe, ta acabante estampar 'Nós, los de Makulusu', del portugués José Luandino Vieira en traducción d'Iván Cuevas y el cuentín infantil 'Animatopeyes' de Rafa R. Valdés y Samuel Castro. A piques de salir, destaquen delles propuestes narratives: la segunda edición de la novela 'Potestas' de Xulio Arbesú, 'La rabia', l'últimu buceu nel xéneru ucrónicu del infrayable Adolfo Camilo Díaz y 'El día de la ira', de Lluis Portal Hevia, alrodiu del asesinatu del políticu Melquiades Álvarez. Nel capítulu de la torna d'obres de la lliteratura universal, Daniel García Granda robra la versión asturiana de 'En llucha incierta' de John Steinbeck y Marta Mori la de la novela 'Cacafonía' de Ken Bugul. La poesía tien el so espaciu ente les prósimes novedaes col poemariu billingüe 'Andanciu/Andancia' d'Esther García López y la traducción del occitán 'Entierru en Sabres' de Bernat Mancie, a cargu de Javier Martínez Concheso. N'otros xéneros, Miguel Rodríguez Monteavaro publica el so 'Estudiu llingüísticu nel centru-oriente asturianu (ELCOA). Pequeñu atles dialectográficu' y Marta Suárez, una esbilla de reseñes crítiques col títulu 'Lletra amable'.

• Temas
• Alitar Asturies