Post-folk: l'otru cantar de la tradición

Dende Coimbra, metanes el so Portugal Tour, l'axitador folklóricu respuende claru: «Nun me veo mui reconocíu nesa etiqueta. Nunca fice folk nin esi estilu foi la música asturiana qu'escuché. El mio camín va de la tradición a la electrónica, la música esperimental y podemos dicir que'l folk me lu salté», desplica. Na so opinión «coles etiquetes, como pasó cola música celta, parez buscase abrir un mercáu y pa mi ye un error, porque más qu'entrar nun circuitu lo que faes ye relegar la to música!. Nun cuida que seya'l casu de L-R: «Lo que faen ye interesante, porque atraen a un públicu más ampliu, nun parten de catalogar lo que ye tradición o non. La so música invita al baile y la xente pueden disfrutar con ello en cualquier tipu d'auditoriu o festival, n'igualdá de condiciones qu'otres propuestes, nun se cierra en sí».

Bada forma parte de la banda actual del autor de 'Manual de cortejo' y tocara prácticamente con toles formaciones del folk asturianu. Desvela que'l propiu alcuñu de postfolk «nació enantes que'l grupu y cásique en broma. Cuadró que cuando nos xuntamos yo taba cola guitarra eléctrica y al probar cola pandereta de Leti vimos que funcionaba. Nesi sen lo que facemos nun s'estrema muncho de lo que toqué notres bandes, quiaes la instrumentación, el timbre, el propiu conceptu sonoru y estéticu». Asegura que la bona acoyida que tuvieron n'eventos de música actual, como'l Xixón Sound y otros «a los que más nos sorprendió fue a nós. Nunca tuvimos un planteamientu rompedor y quiciaes ye una prueba de que per estos llares s'empiecen abrir les mentes. Notros países ye corriente atopar nel mesmu festival a un grupu folk al llau de Coldplay, por dicir. Nós partimos de la etiqueta postfolk, precisamente pa fuxir de les etiquetes: la música ye música y faese pa disfrutalo», argumenta.

La so compañera, Baselgas, tocó la pandereta en diverses agrupaciones tradicionales como Muyeres y ye doctora en Belles Artes, un campu nel que tien investigao les transvanguardies. Afirma que llegó al proyectu de L-R nun camín d'autoesploración: «Llevaba tiempu dando-y vueltes a la figura de la panderetera. Nos grupos tradicionales onde tocara sentíame más una catalizadora interpretando de la forma más pura una xota o una muñeira y dime cuenta que lo que más m'interesaba yera esi resquiciu que queda ente la repetición y repetición d'un informante que nunca ye igual y ehí atopé el niciu creativu, nesi puntu onde s'escapa la etnografía abriéndose a la llibertá creativa de la tradición. Esa ye la mio idea de posfolk y onde me veo situada, foi el descubrimiento de la mio propia voz». Con Bada, caltién, «compartimos la condición de músicos tradicionales que ven la tradición como dalgo vivo, non de manera etnográfica nin ortodoxa. Ensin renunciar a esi raigañu –que tampoco nun podríamos- centranos no musical como forma d'espresión», apunta.

En músicos como Rodrigo Cuevas, Lorena Álvarez, Ún de Grao o Eladio Díaz atopa Baselgas «un afán asemeyáu por volver pisar la tierra y buscar la voz popular» y Bada que «tenemos en común con ellos o con Llan de Cubel y Felpeyu, que facemos toos lo que nos da la gana, ensin condicionantes».