«N'asturianu falten llectores, con ellos dirá viniendo too»

-¿Diría qu'esta ye una novela policiaca, un thriller?

-Sí, tien un puntu de novela negra porque la historia no fondero ye l'intentu d'un personaxe por resolver un crimen y zarrar asina un cabu sueltu de la so vida. Puede definise como un relatu de tremendismu psicolóxicu, tento llevar al protagonista al límite de la obsesión, d'esa esmolición que tien y que nun lu dexa durmir. Busco crear una atmósfera qu'a lo llargo de la novela, según la vas lleendo faite respirar esi aire mugoriento del títulu.

-¿Qué más me puede contar?

-La novela tien tres componentes nos que s'afita. El principal esa trama de la que falaba, pero a la vez hai un homenaxe a los años 80, onde ta ambientada, con toos esos elementos qu'identificamos los que vivimos esa época: les fotografíes analóxiques, los teléfonos de rosca, etc. Y el tercer componente ye una reflexón alrodiu la muerte y sobre cómo la entienden delles persones.

-¿L'escenariu ye el Xixón nel que vusté se crió nesos años?

-Nun aparez el llugar, sí esos años 80 con acontecimientos históricos qu'ayuden asitialo, pero el llugar concretu nun lu dexo claru. Ye Asturies y bien podría ser un barriu de Xixón. Los qu'escribimos inspirámonos nes esperiencies personales , xente real que conocemos y ye verdá qu'esta historia ta inspirada nel barriu onde yo crecí nel Xixón nos 80, pero na novela ye un llugar inesistente, inventáu garrando coses d'equí y d'ellí, pero que podría guapamente ser real.

-Na presentación confesó que n'escribiéndola llegó un momentu nel que se vio somorguiáu nesi ambiente apolmonante de la novela ¿Cómo foi la esperiencia?

-Hai relatos o poemes que puedes escribir saltando d'un a otru o dexándolos al llau, pero cuando decidí qu'esto yera una novela metíme de lleno a terminala y cuando tas ehí embarcáu n'escribir coses tan tremendes, fechos como los que se cuenten nella, acabes respirando tú tamién esi aire mugoriento. Y amás como empatices col personaxe principal, porque ye un antiheroe, al final quedes baltáu, frayáu de tar escribiendo too eso. Por suerte tenía cerca al mio fíu Mael y yera aire fresco que m'osixenaba. La so carina devolvíame la idea de que'l mundu tamién tien coses bonables.

-¿La vivencia foi tan intensa como la que lu lleva a escribir poesía?

-Sería intesante analizar o facer un ensayu sobre les noveles que s'escriben viniendo de la poesía o de les que non, si hai dalgún tipu de diferencia. Nel mio casu viniendo de la poesía sí tenté que dalgún pasaxe tuviere esi posu poéticu col que me presta escribir, pero diría que la novela tien otra manera de bregar con ello. Yo la poesía yo nun la entiendo como narración. No que me toca entrambos xéneros véolos mui direrentes.

-Vusté pertenez a una xeneración casi 'escolingada' ente la segunda del Surdimientu y los más mozos. ¿Cómo valora l'apuesta en munchos d'estos últimos pola lliteratura de xéneros?

-Veo que l'asturianu ta diversificándose hacia tarrenos que nun tenía hasta agora mui cultivaos, incluso na poesía tan faciéndose coses un pocoñin diferentes y eso ye bono, tolo que seya esparder la llingua y que llegue a tolos ámbitos a tolos sectores, xéneros o subxéneros ye positivo. Personalmente véome mui distanciáu d'ello, pero ye cuestión propia, nun ye que lo considere meyor o peor que lo mio. Ye cuestión d'interés o gustu o educación. Siéntome ayenu pero parezme que ta bien.

-¿Qué tien güei pendiente la nuestra lliteratura?

-Anque pareza una obviedá, falten llectores. Con ellos dirá viniendo too. Creo que van ser ellos los que van dir demandando y faciendo espoxigar la nuestra lliteratura y l'asturianu en xeneral.