Música poles Lletres y delles muestres históriques

Actividaes culturales, delles esposiciones dedicaes a Conceyu Bable, una mesa redonda en Xixón colos testigos del entamu del movimientu, un conciertu, el tradicional actu de l'Academia de la Llingua nel Teatru Campoamor del vienres 3 de mayu, Día de les Lletres Asturianes, y la ... manifestación pola oficialidá convocada pola Xunta pola Defensa de la Llingua. Esi ye, en grandes traces, el programa de la 45 Selmana de les Lletres Asturianes, qu'entama esti llunes cola inauguración oficial de los actos organizaos pol Gobiernu del Principáu d'Asturies, la proyección d'un documental que reflexa'l nacimientu de Conceyu Bable, entidad a la que se-y rinde homenax esta Selmana, y la presentación d'un llibru. Tamién se cellebren actos nel Muséu de Belles Artes (una esposición, visita guiada a la mesma y conciertu), na Biblioteca Xovellanos de Xixón (mesa redonda colos testigos del entamu de Conceyu Bable) y l'Auditoriu Príncipe Felipe d'Uviéu, onde tocará la OSPA, baxo dirección de Daniel Sánchez Velasco, con varios músicos solistes. Nel actu del Campoamor, l'Academia acueye a los nuevos miembros de númberu Claudia Elena Menéndez y Pablo Rodríguez Medina, amás d'Eva Buchi (académica d'honor). El sábadu será la manifestación n'Uviéu pola oficialidá.