

Secciones
Servicios
Destacamos
La música d'espresión n'asturianu o gallegu-asturianu sigue calteniendo la so 'cuota' ente les candidatures a los Premios AMAS 2024 que se van entregar el vienres 23 de febreru nel Teatru Filarmónica d'Uviéu na so gala añal y a les que se puede votar a través de EL COMERCIO.es hasta'l prósimu 11 de febreru. En xunto, na edición presente son 16 les nominaciones d'artistes, grupos o formaciones qu'empleguen dafechu la nuestra llingua y l'eonaviego nos sos cantares o de manera vehicular nel casu de los que faen temes instrumentales, dos menos que nos gallardones del añu pasáu. Ye una cifra que se caltién -númberu arriba o abaxo- nun porcentaxe asemeyáu nes últimes ediciones, inda les diverses categoríes nes que concurren -son 22 en total- varien en cada ocasión. Tamién la collecha de gallardones ye distinta cada añu, asina mientres en 2022 fueron namás dos los premiaos, na del 2023 algamó siete nel palmarés final.
Si tenemos en cuenta que'l conxuntu global d'artistes y grupos de la rexón que nun faen usu de les nuestres llingües autóctones ye abondo más ampliu, esa 'cuota' nun dexa de ser curiosa y una amuesa visible del puxu que va algamando la música d'espresión asturiana. La llista de candidatures a los Premios AMAS d'esti añu ye una preba d'ello, con nomes de proyección nacional ya internacional como Rodrigo Cuevas nomináu pol so tema 'Cómo ye' na categoría de Meyor canción folk, una modalidá na que compite con Guieldu por 'Perdayuri', Fontoria con 'La Partida' y Pandereteros d'Anguaño por 'Sociedá de Consumu'. Otros cuatro candidatos comprometíos col idioma copen les nominaciones a Meyor discu folk': Antón Menchaca por 'Los díes contaos', La Bonturné por 'A contraforga', 6 Riales por 'Sutripar' y Tever por 'Suañu de Gaita'. Al empar, la cantante ya instrumentista Mapi Quintana cuenta col so álbum 'Música pa tornar páxaros' na categoría de Meyor discu d'otres escenes, mientres Haim Álvarez & Alfredo Morán col so tema 'Esconsueñu' (con testu de María Esther García López) opten al meyor cantar d'esa mesma especialidá, y el grupu de punk-rock Espantäyu aparez nomináu como Artista o grupu revelación. Ente les candidatures al meyor videoclip, afáyase'l realizador José Luis Velázquez por 'Coral y maera' del grupu Algaire.
A toos ellos hai que suma-yos les cuatro agrupaciones que van disputar el premiu de la categoría de Gaita, ente les que resalta, por tratase d'una formación de rapacinos y rapacines (ente 5 y 12 años), la Banda Magüeta de Xixón, al llau de la Banda Gaites Villa y Condáu de Noreña, la Banda Gaites Conceyu de Llangréu y la Banda Gaites Ribeseya. Amás d'estes dieciséis candidatures, atopamos otres dos artistes venceyaes de dalgunamiente a la música d'espresión na nuestra llingua como la percusionista María José Hevia, nominada na modalidá de Otros instrumentos o la cantante Susana Gudín -que fai usu del asturianu nel so grupu Taranus- a la meyor Voz.
Na edición de 2023 recibieron un Premiu AMAS La Banda Gaites El Gumial (Gaita), Luis Núñez (Lletres), Llevólu'l Sumiciu (Electrónica), La Tarrancha (Directo). Guieldu (Meyor canción folk por 'L'Aremu'), Algaire (Meyor discu folk por 'Coral y maera') y Alfredo González (Meyor canción otres escenes con 'Fuerces pa baillar').
Publicidad
Publicidad
Te puede interesar
Publicidad
Publicidad
Esta funcionalidad es exclusiva para suscriptores.
Reporta un error en esta noticia
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.