«Melquíades ye el políticu más importante de la nuesa historia»

Periodista, escritor ya investigador de la historia y la cultura del so conceyu natal, Lluis Portal Hevia (Villaviciosa, 1964) acaba publicar la so primer novela pa un públicu adultu: 'El día de la ira' (Trabe), una indagación ficcionalizada sobre l'asesinatu del políticu asturianu Melquíades Álvarez n'agosto de 1936. Residente anguañu n'Orán (Arxelia) por motivos familiares y profesionales, fálanos d'ella mientres un viaxe rápidu a Asturies.

-¿Por qué escoyó a Melquíades Álvarez como protagonista real d'esta novela?

-Yera una figura escaecía y na mio opinión el políticu más importante de la historia d'Asturies. Yo mesmu tenía una idea un poco enquivocada d'él, la de que yera una especie de saltimbanqui qu'un día taba equí y otru allá. Y sorprendióme muncho ver que foi coherente colo qu'él planteaba que yera'l reformismu. Tuvo mediu sieglu n'actividá pública hasta que lu asesinaron en 1936.

-Republicanu de primer hora, matáronlu tando presu n'agostu del 36 por fascista. ¿Eso tamién lu atraía?

-Foi tremendu'l final que tuvo. Yera ya un paisanu mayor, tenía 72 años. Dicía el que foi director de 'El Noroeste', Antonio López Oliveros, que n'España podíes ser republicanu, masón, pero si nun tabes nel Frente Popular considerábente fascista. Na época de la guerra foi realmente asina. Pasó-y tamién al abogáu reformista xixonés Mariano Merediz, asesináu na playa San Llorenzo. La palabra fascista usábase entós con bastante frivolidá.

-¿Cuánto hai d'investigación y cuánto de novela nesta?

-Hai bastante d'investigación, como un 85 por cientu, y otro que ye ficción. Sobre la so muerte ya se sabía más o menos, lo que se desconocía yera quién lu matara. Na novela permítome investigar sobre esi tema y creo saber quién foi pol trabayu recién de Carlos García-Alix sobre esa persona, un anarquista, al que na novela cámbio-y el nome.

-Ente les versiones que circularon, taba la de la venganza por El Pichilatu, l'únicu civil fusiláu d'ochobre del 34, del que se dicía yera fíu natural de Melquíades Álvarez. ¿Qué opina usté?

-Yo cuido qu'esa foi una maniobra de Milio Palacios -escritor n'asturianu, autor de 'Les llingüateres'- , que publicaba nel 'Avance', una historia orquestada por esti home. Nun hai datos de que El Pichilatu fuere realmente fíu de Melquíades ÁLvarez. Sí ye cierto que él defendió la pena de muerte pa los revolucionarios, porque cuando vieno a Uviéu cayó-y l'alma los pies al ver como quedara la ciudá y la Universidá onde él estudiara con Clarín. Afectólu muncho y mantuvo esa postura. Pa él la revolución fuera una equivocación. Y de xuro hubo xente que nun-y lo perdonó, eso ya ye otru asuntu.

-¿Como políticu foi lleal cola II República?

-Caltuvo la so postura democrática en tou momentu, nunca s'escondió pa defender les sos idees que yeren les del Partíu Reformista. Yera republicanu pero non radical, sinón moderáu y siempre trabayó pa consiguir un país democráticu.

-Cuando lu mataron, hubo republicanos como José Giral o el mesmu Azaña que lo llamentaron. Azaña mesmo pensó dimitir. ¿Pa usté fueron elementos incontrolaos los autores del crime?

-Yeren seguramente elementos descontrolaos pero con armes llegalmente otorgaes pol gobiernu sobre too na época de Giral. Yo creo qu'arrepintiéronse y de fechu después d'estes muertes sacaron a los milicianos de la vixilancia de la cárcel Modelo pa poner otra vez a los guardies. Azaña sí creo que pensaba no que dixo,pero Giral nun creo que fuere tan sinceru.

-Al asesín usté pon-y el nome de Montesinos.

-El real yera un personaxe de película. Un anarquista dispuestu a too que saliera de los arrabales de Madrid. Tamién foi mui coherente, nel so casu col anarquismu más estremáu, que yera'l mayoritariu n'España. Al final llega a matar a xente namás porque-y cai mal.

-El día de la ira del títulu ye'l que suañaben esos anarquistes más radicales que diba ser el de la redención final.

-Cuando crees nuna cosa tan fanaticamente el resultau ye esi y vémoslo agora con otres formes de violencia indiscriminada como la de los islamistes. Si nun tienes un criteriu alternativu col que comparar, esi planteamientu siempre va esistir y nun ye otru que'l de recurrir al terrorismu pa eliminar al contrariu.

• Temas
• Alitar Asturies