Unes lletres n'al alcordanza viva de Xosé Bolado

La memoria encesa del poeta, críticu y académicu de la Llingua Xosé Bolado (Uviéu, 1945-Madrid, 2021) protagoniza la 44 Selmana de les Lletres Asturianes qu'escomienza güei y va espurrir les sos actividaes hasta'l próximu sábadu 6 de mayu col centru en Xixón, la ciudá na que vivió la mayor parte de la so vida y que-y concedió el mesmu añu del so pasamientu la so Medalla d'Oru a títulu póstumu.

Los actos entamen esti mediudía cola presentación nel salón d'actos del Centru de Cultura Antigu Institutu (CCAI) del volume conmemorativu 'Xosé Bolado. Fálame duce', coordináu por Marta Mori d'Arriba y que recueye les semblances que distintos amigos y personalidaes del mundu de la cultura tracen sobre l'autor uvieín. De siguío va proyectase'l documental 'Na firida del cementu', dirixíu por Ana Lamela, nel que dellos compañeros y compañeres de viaxe del escritor –ente ellos la conseyera de Cultura, Berta Piñán– evoquen les sos recordances personales nuna tertulia como la que l'autor de 'Conxura contra la decadencia' caltuvo nos sos años de residencia en Madrid.

Mañana sábadu, a la mesma hora, nel Muséu Nicanor Piñole, va presentase la obra 'Palabres blanques. Testos d'Historia y Crítica lliteraria' (Trea), una escoyeta fecha por Marta Mori d'Arriba de los trabayos más significativos de la so xera como estudiosu de les nuestres lletres. El llunes 1 de mayu, a les 19 hores, nel Teatru de la Llaboral, va estrenase l'espectáculu poéticu-musical 'Flores escontra'l desamparu', nel que participen los actores Carlos Alba y Laura Cuervo Álvarez, Susana Gudín (sopranu), Delia Gutiérrez Aranda (flauta) y Iván Fernández Prieto (tiorba), con dirección d'Ana Lamela.

Nel día siguiente, les actividaes treslládense hasta A Caridá, onde nel Auditoriu de As Quintas va cellebrase'l recital 'Hailas. Homenaxe as poetas del Navia-Eo' cola intervención de Conchita Álvarez Lebredo, María José Fraga y Marisa López-Diz, acompañaes pol dúo Mestura. El tradicional Conciertu de les Lletres ufiertáu pola Orquesta Sinfónica del Principáu d'Asturies adopta nesta ocasión forma de musical escolar-familiar cola interpretación del espectáculu 'Historia d'un bosque', de Nacho Fonseca, nel qu'amás de la OSPA –dirixida pol maestru Rubén Díez– participen el Grupu d'Animación Musical Escolar (GAME), la Escuela de danza Alazne Castaño y voces femenines de la Escuela de Música Divertimento y Siero Musical, con Marta Fernández, María Alonso y Ellie Garnham como solistes, amás de Maite Casado y Alberto González como narradores. Va haber dos pases pa escolinos na mañana del miércoles 3 y una sesión pa tolos públicos el xueves a les 19.30, tolos tres nel Teatru de la Llaboral.

Tres la cellebración del Día de les Lletres el viernes 5 de mayu, col actu institucional de l'Academia de la Llingua nel Teatru Campoamor a les 19 hores y l'avezáu descuentu en llibros y discos n'asturiano o n'eonaviego, va pesllase esta edición númberu 44 con una llectura de poesía moza al meudía del sábadu 6 nel Muséu Nicanor Piñole de Xixón y la presencia d'Aida Escudero, María Fernández Abril, Alejandro Fernández-Osorio, María García Díaz, Xaime Martínez y Pablo X. Suárez, amás de l'actuación del grupu Tierra y Eco.

• Temas
• Alitar Asturies