Residencies lliteraries, espacios pa crear y conectar

L'accesu a beques y estancies temporales nel esterior empobinaes a la creación lliterario nun ye nuevo nes nuestres lletres. Autores como Xuan Bello o Martín López-Vega foron seleccionaos nel so día pa residir n'instituciones como l'Academia España de Roma, por remembrar dos casos d'escritores na nuestra llingua con proyección internacional. Va tres años, la Conseyería de Cultura roblaba un conveniu cola Residencia 1863 de A Coruña p'acoyer autores asturianos y el primer candidatu en disfrutala fuera Miguel Rodríguez Monteavaro, al que diba siguir l'añu pasáu Pablo X. Suárez. El primeru nun dulda agora n'afirmar qu'esa estancia: «Foi una esperiencia bien positiva. Abrióme un mundu de posibilidaes lliteraries. Non solo me dediqué a escribir sinón a conocer de primer mano la escena gallega que ye potentísima y gracies a la residencia ficiéronse traducciones de los mios poemes al suecu, francés, inglés, occitanu, hindi. Movime per munchos espacios gracies a la xente que conocí ellí: fui a varios festivales de poesía n'India y esti añu, nuna selmana, voi a México gracies a haber tao ende», desvela.

Rodríguez Monteavaro alude a la convocatoria abierta pa la Beca Asturies pa animar «a tolos autores asturianos a presentase porque paga la pena» y nesi sen considera que «tenemos de creenos que tenemos una lliteratura como la de cualquier parte del mundu y tirar por ello. Cada vez qu'ando per festivales atopo mui bona acoyida a la lliteratura asturiana, porque'l restu del mundu ta abiertu a nosotros». Esa proyección esterna de les nuestres lletres ye un de los oxetivos qu'afaló a Inaciu Galán nel so proyectu de la Residencia Lliteraria Xixón: «Parecióme una idea mui interesante pa poner en contactu la lliteratura asturiana cola d'otros territorios. Conocía l'espaciu que dirixe Yolanda Castaño en Galicia y agora sé qu'hai otros asemeyaos como La Casa Verdaguer de la Lliteratura en Barcelona o la Casa de Belmonte en Aragón. Equí surdió la posibilidá de faer dalgo asemeyao porque disponía del apartamentu onde viví y escribí los últimos diez años nel barriu l'Arena. La escoyeta de Xixón tien tamién de ver cola gran cantidá d'actividaes lliteraries na ciudá, dende POEX a FELIX o la Selmana Negra y los residentes podíen encaxar nesos o n'eventos asemeyaos. Amás preténdese que con cada autor o autora invitaos puedan entamase talleres de traducción de la so obra con escritores asturianos y que participen en presentaciones de llibros, recitales, coloquios. Qu'haya esi intercambiu con ellos amás de la propia estancia», desplica.

Galán cuenta cola collaboración de l'asociación Nial Cultural y Cuatro Gotes Producciones pa poner en marcha el so proyectu alrodiu del que tien entamao ya contactos con delles instituciones y que podía abellugar les primeres actividaes l'añu que vien. «El propósitu ye poner Asturies nel mapa de les residencies lliteraries», caltién l'escritor que pon a disposición de los futuros invitaos al espaciu xixonés alrodiu de 2.000 volúmenes de la so biblioteca personal, una compañía inspiradora y un brinde a que conozan de primer mano la nuestra lliteratura.