Javier Martínez Concheso

«La novela da una visión equilibrada del 34»

Javier Martínez Concheso (Llaviana, 1970) ye l'autor de la traducción al asturiano de 'L'home de choque' (Trabe), una novela del Premiu Goncourt Joseph Peyré ambientada na revolución d'Ochobre del 34 y publicada dos años después de los fechos. Responsable de verter a la nuestra llingua 'Cándido o l'optimismu' de Voltaire o 'L'entierru en Sabres' de Bernat Manciet, fálanos d'esta obra dende Francia, onde vive.

– ¿Conocía la novela enantes que-y encargaren la traducción?

- Non, nun la conocía y foi un verdaderu descubrimientu. La llectura sorprendióme en bien d'aspectos. Nun primer tiempu lo que más me llamó l'atención foi lo bien documentada que taba, non solo sobre los fechos históricos que rellata, sinón tamién sobre aspectos de la cultura asturiana como la llingua, el paisaxe o la economía. Una llectura más posada fíxome ver les cualidaes más propiamente lliteraries de la novela que faen de Peyré un gran escritor.

– ¿En qué s'estrema d'obres sobre'l 34 d'autores franceses como Albert Camus?

– En francés, aparte de la de Camus, hai tres obres contemporánees qu'evoquen la Revolución d'ochobre: un monólogu teatral de Jacques Prévert, una crónica gráfica d'Helios Gómez y un relatu autobiográficu de Corman Mathieu. En toes alviértese una simpatía evidente pa colos revolucionarios y los autores nun escuenden el so partidismu,lo que nun-yos quita valir lliterariu na mio opinión. 'L'home de choque' estrémase d'elles na so voluntá de dar una visión equilibrada de los acontecimientos, aparte de que ye la que meyor reflexa la realidá asturiana, de la que los otros autores nun teníen un conocimientu mui fondu.

– ¿Sábese si Peyré tuvo equí documentándose?

– Nun tengo informaciones. Ta claro que manexó una importante documentación: artículos de prensa, pasquinos y probablemente obres como 'Los pequeños anales de 15 días' d'Aurelio del Llano. Dalgunes alusiones a la cultura asturiana, como les referencies a La Rexenta son bastante superficiales, pero les sos observaciones, sobre'l paisaxe o la manera de falar de los personaxes por casu, dexen pensar qu'efectivamente tuvo personalmente n'Asturies y seguramente visitó dalgunos de los escenarios evocaos na novela, como Uviéu, les cuenques o Grau.

– ¿Dexa entever el sesgu ideolóxicu del autor?

– Nun tengo constancia de que Peyré militara en nengún partíu o sindicatu, lo que nun quier dicir que nun s'interesara pola política. De fechu podemos considerar 'L'home de choque' una novela política y les diferentes tendencies del movimientu obreru apaecen reflexaes, anque más que nos aspectos ideolóxicos céntrase nel aspectu humanu. Peyré muestra una cierta empatía y almiración pa con tolos revolucionarios, sacante'l personaxe del rampleru comunista. Ello nun quita que reflexe los sos escesos, denuncie l'actitú de dalgunos de los sos dirixentes y reconoza'l valor de los guardies civiles que defenden el cuartel o los soldaos atrincheraos na catedral

– ¿Qué ecu tuvo nel so tiempu?

– L'home de choque' publicóse na editorial Grasset, una de les más importantes de Francia y ficiéronse casi inmediato dos traducciones al inglés, una n'Estaos Uníos y otra n'Inglaterra, lo que da a entender que tuvo una recepción bastante bona al principiu. Sicasí, quiciabes pol contestu históricu de la Guerra Civil y la II Guerra Mundial la novela foi cayendo nun escaezu relativu, anque tuvo una reedición en formatu de bolsu en 1973 y, más de recién, en llibru electrónicu.

– ¿Cuálu ye'l so interés pal llector asturianu de güei?

– La Revolución d'ochobre del 34 foi un de los episodios más importantes de la nuestra historia, pero ye seguramente más desconocida de lo que creemos pa buena parte de los asturianos. Obres de ficción como esta son una buena manera de facer un primer averamientu a estos acontecimientos. Pero, na mio opinión, 'L'home de choque' ye novela d'una gran calidá en sí mesma, pola sensibilidá del autor y la so capacidá pa recrear personaxes, llugares y acontecimientos concretos y da-yos un calter universal. Nesti sen ye una novela interesante pal llector de cualquier llugar.

• Temas
• Alitar Asturies