Borrar
Marta Mori. Paloma Ucha
«Nesti llibru hai una evolución dende l'intimismu a lo social y colectivo»

«Nesti llibru hai una evolución dende l'intimismu a lo social y colectivo»

Marta Mori. La escritora y académica xixonesa publica 'Los carreros del tiempu', Premiu Acebal de Poesía

Viernes, 23 de junio 2023, 16:46

La escritora y académica Marta Mori d'Arriba (Xixón, 1965) acaba publicar 'Los carreros del tiempu' (Impronta), el llibru col qu'algamó'l Premiu Xuan María Acebal de Poesía. Fálanos d'él y de la so visión del momentu actual de la nuestra lliteratura.

-Xugando col títulu del llibru, ¿el tiempu abrió carreros nuevos a la so poesía?

-Nesti poemariu hai una evolución dende l'intimismu que caracterizó siempre la mio obra a la preocupación polo social y lo colectivo. Vese nes distintes partes que ta estructuráu, dende la titulada 'De vita privata' a les siguientes, onde hai una poesía de la naturaleza o salen temes como'l de la mio xenealoxía familiar como muyer, la violencia sexual o la necesidá de buscar un discursu nuevu pa entender Asturies, superando la señaldá pola perda de lo rural o la desindustrialización.

-¿Cómo foi esa evolución dende la lírica o lo elexiaco que marquen bona parte de la nuestra lliteratura?

-Soi fia de la mio época y lo que predominaba a nivel ambiental yera l'hedonismu y l'arte pol arte, por usar la espresión de les vanguardies. Entendía la poesía como lírica porque había un contestu que lo afalaba, mesmo un rechazu de lo social. Yo escomienzo escribir al través de la poesía asturiana y les mios referencies yeren Xuan Bello, Lourdes Álvarez, Berta Piñán. Entro con una mirada acordies a esa forma d'entender la poesía ya inda dalgún testu sobre lo colectivo siempre tuvi: 'El mio país' o 'Si digo llingua', por citar dellos, pero, en xeneral, el tonu yera asemeyáu al de la xente del mio tiempu. Fui desprendiéndome d'eses influencies al abrir llectures.

Los carreros del tiempu | Marta Mori

Impronta, 2023.

84 páxines.

15 euros.

-¿La propia realidá afalóla a cambiar?

-Ye obvio que'l contestu sociohistóricu cambió, el mio compromisu social agrandóse y quiero señalar tamién la delda cola xente más mozo. La poesía que tán faciendo dellos d'estos autores ta enseñándonos a los que tenemos más edá a escribir d'otra manera.

-¿En qué sentíu?

-Nel mio casu, hai una reciprocidá clara, porque, tando al frente de la revista 'Lliteratura', toi mui en contactu cola poesía moza y a la vez creo que soi mui permeable. Hai xente que nun cambia nunca de la so manera de ver la vida pero a mi gústame aprender de la xente mozo. Nun m'encasiello nun determináu rexistru sino que voi esperimentando distintes maneres y dexándome llevar polo que lleo si me parez interesante.

-¿Ve un enfotu nesos autores nuevos por tentar salir del bucle de lo minoritario?

-Ye cierto qu'esta xente abre'l campu de temes y faen una poesía mas conectada cola realidá y a veces más clara, cenciella, más directa, más recitable, pero tampoco tenemos que ser tan duros con nós mesmos y pensar que tola culpa de que sea minoritaria ye porque escribimos temes demasiao esquisitos o personales o usamos un llinguaxe demasiao complexu. Ye la situación del asturianu la que-y da calter minoritariu. La responsabilidá nun ye de los autores, sinón política.

-Na lexislatura qu'acaba la política llingüística tuvo en manes d'escritores. ¿Cómo valora'l so llabor?

-Ficiéronse coses mui interesantes como'l circuitu 'Autores nel camín' o la promoción esterior y sería positivo qu'eso tuviere continuidá. De toles maneres, una acción simplemente cultural ta claro que va tener siempre un impactu limitáu. Tien de dir acompañada d'un avance na escolarización, nel usu administrativu de la llingua polos ciudadanos, na so presencia más fuerte nos medios públicos. Cuando eso meyore, voi creyer qu'hai un gobiernu que quier salvar l'asturianu.

Publicidad

Publicidad

Publicidad

Publicidad

Esta funcionalidad es exclusiva para suscriptores.

Reporta un error en esta noticia

* Campos obligatorios

elcomercio «Nesti llibru hai una evolución dende l'intimismu a lo social y colectivo»