Ana María García, la pastora llanisca denunciada al Santu Oficiu polos sos supuestos tratos col diablu en 1648, ye la protagonista de la novela gráfica 'Ana María. La Llobera d'Asturies', cola que Guillermo Menéndez Quirós (La Felguera, 1994) algamó'l Premiu Alfonso Iglesias y que va ser presentada esti domingu al meudía na carpa Alborá de la Feria del Llibru de Xixón. Publicada pol sellu Impronta, ye'l resultáu d'un llargu y intensu llabor d'indagación personal del illustrador llangreanu alrodiu una figura, qu'al pesar del so calter real documentáu caltién abondo de personaxe arrodiáu de llenda, maxa y borrina, como la propia tierra del Oriente asturianu na que nació y se crió.
La historiadora ya investigadora de la tradición oral Marta Elola retrátala nun de los testos qu'arropiellen el cómic -l'otru ye de la filóloga María Cueto- con palabres que tanto valen pa definir al personaxe ciertu como al que güei pudiere proyectase na nuestra imaxinación, porque, ensin xuntar los dos, nun se podía entender dafechu la so figura: «Ana ye un casu estremu de muyer que vivió a la parte d'afuera de la sociedá, qu'escoyó la naturaleza por abellugu y comulgó con ella. Representa l'antítesis del home llibre, el buen salvaxe, que se val de la so intelixencia p'aprovechar los recursos qu'atopa, que domina y controla, gracies a la so fuerza y a la superioridá moral, a los animales. Tolo contrario qu'ella,(...) qu'adoma a los llobos, hasta'l puntu de que, criminal como ye, van poniéndose-y traces casi animales. (...) Nun hai domesticación, hai poder y, como nun pue ser d'otra manera, pola so debilidá como muyer, un poder perversu, demoniacu».
Pal autor d'esti cómic tamién s'entemecen entrambes visiones na recreación d'una vida singular a la que llegó, cuenta, dende'l conceyu llaniscu onde reside: «De fondo taba l'interés que siempre tuvi pola mitoloxía y les bruxes dende bien pequeñu. Otru factor importante ye la relación que yo caltengo col Oriente d'Asturies, la zona de ónde yera ella y l'estímulu de figurame esa historia contestualizada nun paisaxe que tovía güei sigue caltieniendo muncho de salvaxe y misteriosu. Parecíame fascinante esa muyer venceyada a la bruxería y al tener tratao con llobos, y el desconocimientu qu'hai d'ella», desplica.
El dibuxante apunta que, después de tener buscao información sobre Ana María García y lleío trabayos como'l que sigue el procesu que la llevó énte'l Santu Oficiu -y del que salió llibre- na pluma del ex presidente asturianu Rodríguez Vigil, atopó que «pagaba la pena tirar d'esi filu pa reconstruir esa historia, pero nel mio casu más dende la inspiración que sofitándome en ser fiel a la propia historiografía. El propiu relatu que fixi ta tamién como ella mesma ente lo real y lo máxico». Dotramiente a Menéndez Quirós nun-y cayó embaxo la llectura que podemos sacar dende'l presente del casu d'una muyer como la llobera llanisca del sieglu XVII: «Nun foi dalgo intencionao, pero parezme que puede tener interés a día de güei la independencia de la so figura femenina y rescatala de los márxenes de la historia oficial, o la so rellación colos llobos, otru aspeutu qu'anguaño puede resonar bastante». Un propósitu delliberáu sí foi, revela l'illustrador, contar esti relatu na fala patrimonial de los llugares onde Ana María vivió y se formó: «Escoyer facelo nesta variante tien una razón de da-y realismu porque d'una forma mui asemeyada falaría esa xente y per otru llau quixi facer un guiñu o homenaxe a los falantes actuales d'esa 'h.abla' -como dicen equí- pa facelos partícipes de la tradición lliteraria contemporánea na nuestra llingua. Ye dalgo que señala nel so testu María Cueto, que revisó tol trabayu y dio-y empaque a esi rexistru patrimonial. Ella cellebra que nun dexare escapar la oportunidá de reflexar esa especie de doble marxinalidá de la protagonista, na historia oficial y la de la propia fala».
L'illustrador llangreanu tien abordao n'anteriores obres suyes o na que tien a piques d'asoleyar: 'La batalla del Mazucu' la recuperación necesaria de la memoria histórica.
«El cómic, la lliteratura, el cine son bones ferramientes pa devolver a l'alcordanza colectiva fechos que fueron borraos o ocultaos d'ella por estremaos intereses y nesi sen esta novela tamién puede inxertase nesa esmolición mía y que me siento arguyosu de compartir con otros creadores asturianos col mesmu enfotu como Alfonso Zapico o Berto García nel cómic o nel cine documental Ramón Ll. Bande o Pablo Casanueva», asegura.
-U22016397474249nE--170x119@La%20Rioja-LaRioja.jpg)
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.