«El futbol que m'interesa ye'l de Segunda B p'abaxo»

Pablo Barrio (Mieres, 1978) estrénase como autor n'asturianu cola novela 'Xugar a nada' (Trabe), una hestoria de xéneru negru col mundu del fútbol d'escenariu como espaciu afayadizu a los negocios turbios y tamién de socialización cotidiana. Llicencíau en Filoloxía inglesa, especialista en Filoloxía asturiana y con un máster en Llingüistica aplicada, trabaya anguaño como docente nel IES Carmen y Severo Ochoa de L.luarca. Dende Ortigueira (Cuaña), el llugar onde reside fálanos del so debú lliterariu.

– ¿Qué lu afaló a entamar esta novela?

– Llevaba munchu tiempu con ganes d'escribir y por unes coses o otres nunca hubo la manera. Foi na pandemia cuando atopé la ocasión de poneme nun momentu en que nun taba trabayando y animáu por Laura Marcos, que ye amiga mía. Ella pudo lleer el manuscritu y prestó-y. Asina foi.

– ¿Por qué entamar con una historia de xéneru negru?

– Foi filvanándose asina, conectando otros testos que tenía y onde aparecía un cadabre, según diba escribiéndose acabó garrando vida propia. Y tamién, anque yo nun seya un llector de xéneru negru, siempre me llamó l'atención esti tipu de noveles.

– ¿El marcu acutáu al desarrollu d'una trama d'investigación sobre un socesu, foi lo que lu afaló a qu'esta primer obra fuere policiaca?

– Puede ser, tener un marcu más claru que n'otros xéneros con una serie elementos que son propios de la novela negra fixo que m'abultara más fácil escribila. Y, anque pareza anecdótico, nací en Mieres y criéme ellí, a la mio muyer siempre-y llamó l'atención que tanto la mio familia como yo parecíamos tener munchu interés en comentar los sucesos, nun sé si habrá daqué na cuenca que fai que nos interesen estes coses, o que tamos na parte puerca de la sociedá. Lo truculento ye dalgo que casi tocamos coles manes, que ta na nuestra cotidianidá de dalguna manera.

– Nesta refléxase el fútbol como una de les sos pasiones y un ámbitu onde llegó mesmo a facer cróniques deportives.

– Sí, facia cróniques pa 'Futbol asturiano' de los partíos del occidente y el fútbol, ye verdá, apasióname. Fui sociu del Caudal, sigo siendo d'esi equipu, agora soi sociu de Los Castros, l'equipu de Cuaña, y tengo un nenu que xuega. Sicasí, foi más afición de lo que ye, en casa malapenes veo partíos, el futbol que m'interesa ye de 2ª B p'abaxo, esi futbol modestu, Caudal, Llangréu, Avilés y el de base, que ye lo que me parez guapo de verdá.

– Nel so relatu aparez tamién bien resaltada la so cara escura ¿Hai tamién negocios turbios nesi fútbol modestu?

– Ye verdá que neses categoríes ye menos visible tol trama fea del negociu, pero sin querer acusar a naide, parez asomar un poquitín y esos tentáculos lleguen ehí coles sos ramificaciones. De fechu taba demostrao fai unos años que yera más fácil facer trampes nes apuestes nel fútbol de 2ªB pa baxo que p'arriba. Un poco d'eses sombres espéyase equí.

– Debuta d'una manera que nun parez l'avezada na nuestra lliteratura, ensin recurrir a la llanzadera de los premios. ¿Yera parte del retu?

– Presenté namás un cuentu a un concursu, porque soi bastante malu pa cumplir plazos. Entiendo que puede valir como llanzadera a la hora de publicar, pero a mi cuéstame bastante trabayu. Quixe más escribilu ensin esa presión de facelu a ver si puede ganar, sentíme meyor tirando p'alantre y si despues gusta bien, y sinón nun pasa nada.

– Xeneracionalmente ta metanes la segunda promoción del Surdimientu y les nueves, onde la fantasía, ciencia ficción, el terror paecen encarrilar a bien d'autores. ¿Qué opinión tien d'esi fenómenu como autor y llector?

– Hai un grupu de xente que fala del momentu de la popularidá, la democratización de la lliteratura, yo como referencies pienso qu'hai una serie d'escritores más veteranos como Xuan Bello, Xandru Fernández, Antón García que m'interesen munchísimo. Paezme bien que si la xente nun alcuentra lo que busca cree los sos propios modelos, nesi sen ye un momentu guapu, anque a mí personalmente la pantasía ye un xéneru que nun me va muncho, nun lu menosprecio, pero nun lu disfruto como llector, quiciabes por falta de conocimientu. Al llau d'esa corriente hai una fuerza renovadora tamién con autores como Xaime Martínez, que me parez un grandísimu escritor.

• Temas
• Alitar Asturies