Alejandro Díaz Castaño (Bimenes, 1979) ye director, rostru y alma del Festival Internacional de Cine de Xixón (FICX). Autor del curtiumetraxe 'Ihesa (La fuga)' proyectáu en festivales como San Sebastián, Abycine o BACIFI, ye menos conocía la so vena poética escamplada nun primer llibru publicáu en 2016: 'Olvidos vergonzosos (Veinte pasos en el vacío)'. Agora debuta como poeta n'asturianu col volume 'Na faltriquera', editáu por Impronta y que presenta mañana sábadu a les 13.30 nel café Toma 3 de la mano de Daniel Acevedo, responsable de la introducción.
Estructuráu en cuatro partes, siguiendo les estaciones del añu, Díaz Castaño ufierta un conxuntu de poemes d'apariencia senciella, pero con fonda carga emocional o reflesiva nos que la infancia –la vívía, la remembrada y la sentida dende la paternidá– actúa como fonte de vasos comunicantes ente pasáu, presente y futuru. Escritu ente 2021 y 2023, talo desplica'l propiu autor, «nos ratos llibres, en tardes de domingu interminables, dalguna nueche d'insomniu, viaxes n'aviones», el resultáu ye esti «llibru piqueñín que me resulta terapéutico y tamién ilusionante». A propósitu de d'ello, asegura que «bona bona parte de los poemes falen de la mio infancia y d'imaxenes o alcordances que m'asaltaron cuando la mio fía Gretchen cumplió dos años y veíame a mio mesmu recordando aquellos momentos, quería tresmiti-ylos a ella porque son recuerdos d'un mundu, el de Bimenes, que ya nun esiste, un llugar ensin tecnoloxía, analóxicu, que me resulta refrescante por eso evocar, pero que tenía tamién coses cásique medievales (rises)».
Nesi sentíu, la escoyeta de la llingua na que s'escribió afirma que «el fechu de que tea n'asturianu ye totalmente natural porque nesi mundu la xente al mio rodiu falaba un asturianu 'bastante cerrao' y con eses peculiaridaes de la zona: 'isi muzu ye tuntu', 'lis vaquis'. Intento recuperar un poco tou esi mundu que parpaguies y ves que ya nun esiste, xente que sal nel llibru y que tamién desapareció, y amás tengo la sensación de que naide s'alcuerda d'ellos, dalgo que tamién m'obsesiona tamién, xente que pasa pel mundu y dexa bien poca buelga, a nun ser na memoria d'un. O les costumes, como la de coyer a xente en coche que topabes y al entrar traíen con ellos los olores de la so casa. Nel asientu d'atrás, sentáu al so llau, yo observaba a esos paisanos que xubía mio padre nesos iviernos de carreteres xelaes y un frío que traíen tamién consigo al montar en coche». Sicasí, el poeta yerbatu matiza que «non namás hai recuerdos reales sinón que se mecen fabulaciones, personaxes imaxinarios coloa qu'esisten o créense a partir d'otros que conocí. Reformúlense situaciones y llévense a un llugar que ye tamién amestao de ficción y non ficción. Hai episodios que son tal cual, otros son coses qu'escuché, al final con too confórmase esi universu de la infancia».
En cuantes a la espresión cenciella y breve, apunta que «ye un intentu de mostrar les coses ensin demasiao artificiu, anque tamién hai otres más enveleanaes, añaes con un puntu d'escuridá. Encantaríame ser la persona más gayolera y positiva del mundu, pero a les veces sal esi llau inquietante, de fechu hai siempre dalguna sombra pululando nos versos». La división marcada poles estaciones remite al tiempu clíclicu de la natura nesi mundu perdíu, inda recalca que «l'orde que-y doi nun ye l'avezáu sinón el del procesu d'escritura. 'Seronda', la parte cola que s'abre y la más llarga, sal d'una situación personal de cierta estabilidá y tranquilidá, y d'ehí pasa a estaciones más estremes como'l branu o l'iviernu, con xiros como'l d'una crisis de salú nel añu 22 y otra sentimental nel 23. Faen que'l llibru tenga un devenir mui apegáu a la mio esperiencia vital. Y termina cola primavera, lo más esperanzador, personificao na mio fía». Pa ella, revela, ta escritu sobre too esti llibru que confiesa «mui personal, hasta'l puntu de que revolvióme un poco sacalu y en realidá ta fechu pa que Gretchen lu pueda lleer y pa mi, pero tamién cuento que pueda haber otres persones que se sientan identificaes».
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.