Doce uves prestoses pa despedir l'añu

La producción cultural n'asturianu dexa cada añu una collecha más bayurosa y polo que toca a esti 2023 fuimos dando bona cuenta d'ello nestes mesmes páxines. Préstanos despidir l'añu vieyu proponiendo una docena de llibros y discos que contamos pueden ser d'interés pa un ampliu abanicu de públicu y poro candidatos afayadizos pa xuntar na llista de pidiciones a los Reis Magos. Caún d'ellos tamién puede cumplir como un perfectu autorregalu.

Ente les novedaes lliteraries que dexa 2023, una de les más recientes ye 'La Xorda. Nuevos cantares de chigre', el debut editorial del artista Rodrigo Cuevas y una auténtica guía espiritual pa siguir los distintos momentos d'una nueche de folixa sin dexar de cantar. Con un planteamientu bien distintu inda con asemeyáu enfotu festivu, otru llibru que surde de la música asturiana, el 'Diccionariu Berrón', una obra imprescindible pa calletrar y disfrutar tanto de les lletres como de la filosofía del míticu grupu Los Berrones. Ensin dulda una contribución bien singular y prestosa a la lexicografía de la nuestra llingua al algame de cualquier llector con más ganes de pasalo bien que de reconcomese en esmoliciones filolóxiques. Y si les anteriores suxerencies lleven ya la seña impresa del bestseller, un títulu que lo ta siendo dende que salió: 'Asturies nunca vencida' del filólogu y académicu David Guardado, un llúcidu y amenu ensayu que nos guía a reflexonar sobre la nuestra identidá como pueblu.

Otres propuestes pa toa triba de llectores bien pueden ser la reedición de los 'Cuentos populares asturianos' de María Josefa Canellada, entamada pol Seminariu de Filoloxía Asturiana de la Universidá d'Uviéu y arropiellada por testos de los profesores Xuan Busto y Xulio Viejo. Y dos novelines tovía cola tinta fresco: 'Bederre', la divertida ópera prima d'Ana Pereira y 'La última batalla del capitán Fierro' del mozu y ya prolíficu Andrés Fernández.

La escoyeta musical trainos otra vuelta al nome del nuestru axitador folklóricu más universal y el so álbum 'Manual de Romería' nel que Cuevas pon la llingua asturiana en bona parte de los sos cantares, un exemplu: 'Como ye', reciën escoyíu meyor del añu pola revista Rockdelux. Xunta él, una música y cantante de llarga trayectoria que forma parte de la so banda en directu, Mapi Quintana asoleyó esti añu dos verdaderes xoyes, los discos 'La Maramoniz' y 'Música pa tornar páxaros', talentu, sensibilidá y emoción a manes llenes. Veteranos tamién na escena del país, La Bonturné amuesen la calidá y puxu del so faer nel so álbum 'A contraforga', bonu pa echar un bailín o pa dexase llevar. Y dos exemplos de lo fuerte que vienen pisando los artistas de les xeneraciones más moces: los maliayesos Alienda col so primer trabayu homónimu y una personal manera d'entender el folk tan potente como curiosa. Sones de la tradición con nuevu aire gasten tamién el tríu llangreanu 6 Riales que s'estrenen d'igualmiente col discu 'Sutripar', poder pandereteru y bien gustoses enerxíes pa compartir en bona xuntanza.

Estes suxerencies son namás el picu del iceberg de lo muncho y granible que pueden topar na nuestra llingua en cualquier llibrería, tienda de discos o plataforma dixital. Ayalgues toes de la creatividá y vitalidá na que desenvuelven les sos idees los nuestros creadores. Cualaquier d'elles puede ser un magníficu regalu col qu'acompañar los meyores deseos pal 2024 que ta a piques d'empezar.

• Temas
• Alitar Asturies