Lliteratura d'imaxinación, un camín abiertu a nuevos mundos pa la Llingua

Fieles al nome del proyectu con él preténdese «lo mesmo que Radagast, del que se diz que yera'l que más ciñu-y tenía a la tierra, traer un poco de maxa a les nuestres lletres nunos xéneros de los que taben abondo güérfanes, quitando obres d'autores individuales. El propósitu de la editorial ye sistematizalo ufiertando un productu que pensamos puede enanchar la base de llectores na nuestra llingua, cásique invariable dende los años 90», desplica Bardio. Amás de la puesta andar del nuevu catálogu, la iniciativa entamada pol escritor tien convocao un premiu de novela fantástica pa menores de 35 años, col qu'esperen animar a los narradores mozos a presentar obres nun xéneru que «en premios como'l Xosefa Xovellanos, alcuando los xuraos tienden a considerar más propiu de lliteratura xuvenil, como me tien confesao dalgún de los sos miembros alcuando. Nel nuestru casu, la dotación ye bastante probe: 300 euros y la edición, porque emplegamos fondos propios, ensin el respaldu de nenguna subvención», detalla'l fundador de la editorial.

Esitosu autor de 'La colomina 36' (Trabe) -Premiu Asturies Xoven- y de la versión lliteraria del xuegu del rol 'Después d'Ochobre' (publicada en Radagast), a Bardio prestába-y repetir nuna bona acoyida de la so recién novela 'Del Llau del Nigromante'. Trátase de la primer entrega d'una saga escomenzada va quince años «con una novela mui llarga que ta en caxón y nunca va salir d'ehí, na qu'inventé un mundu que diba retomar tiempu después y del que surde esti relatu», desvela.

El so protagonista ye Égor Balzarec, un mozu magu y nuberu qu'una nueche despierta plasmáu en viendo que-y salen chispes de les manes y descubriendo que puede tener un don especial: «Vive nun pueblín pequeñu y marcha a la ciudá pa poder formase na maxa, y cuando vuelve entérase de que tol so mundu desapareció: morrieran la familia, los amigos, el mesmu pueblu. Alloria por nun haber podío llegar enantes pa evitalo y metanes la so desesperación obsesiónase con querer traelos de vuelta, escomenzando a facer experimentos de maxa negra pa llogralo. Ye un nigromante, pero'l filu que lu mueve ye facer el bien», revela a cuentu d'una novela que nes sos palabres: «Ye d'imaxinación y d'entretenimientu, pero tamién plantega delles cuestiones de calter moral, tentando romper cola idea d'una fantasía conservadora, na que los nigromantes son los malos y frayar esos clixés ya tan vistos», apunta. Les impresiones que-y lleguen de los que la remataron coinciden «en que ye escura y con partes dures, pero que dexa gana de siguir lleendo. Y esi ye'l propósitu d'una saga», asegura.