La llingua asturiana, nel focu del conocimientu

La Facultá de Filosofía y Lletres de la Universidá d'Uviéu, nel campus d'El Milán, va acoyer dende esti martes 5 de payares al xueves 7 les 42 Xornaes Internacionales d'Estudiu de l'Academia de la Llingua Asturiana, una cita ya avezada col conocimientu filolóxicu y los trabayos d'investigación alrodiu del nuestru idioma que cada seronda xunta a especialistes del ámbitu asturianu, español y global col envís d'esponer les sos aportaciones nun marcu abiertu de disciplines que s'esparden dende la llingüística a la crítica lliteraria, la romanística, la historiografía o la sociollingüística.

Les Xornaes escomiencen el prósimu martes a les 12 del meudía cola inauguración institucional a la que va siguir la presentación de los númberos 131 de 'Lletres Asturianes' y 14 de 'Ciencies: Cartafueyos Asturianos de Ciencia y Teunoloxía', a cargu de los sos directores, Ana Cano y Carlos Lastra, respectivamente. A las 13 hores ta prevista la conferencia 'El códice del Fueru Xulgu de la Bilioteca Estatal de Baviera: cuestiones de datación y localización', de la profesora Elena E. Rodríguez de la Universidad de Huelva. Pela tarde, de les 16 hores pa en delantre, van entamase dos meses de comunicaciones. Na primera van intervenir Elena Álvarez: 'Témporas d'eiquí, un poemariu de Fernán Coronas»; Adrián Martínez: 'Lo qu'escuende l'estoyu: xenealoxía histórica del fondu documental de Fernan Coronas'; y Diego García: 'El Regionalista Astur, breve aproximación historiográfica'. Y na siguiente mesa, Noelia S. García con 'Teatro en femenino. Una relectura del teatro costumbrista asturiano con perspectiva de género' y Pablo Rodríguez Medina: 'Burla, burlando: l'asturianu como elementu caracterizador na obra de Manuel Álvarez Marrón. El pieslle de la xornada van ponelu Jacinta Bujanda Suárez con 'Un homenaje a la lengua de mis abuelos a través de una Lotería Asturiana' y la conferencia 'Revisión crítica de las etimologías vascas del Diccionariu Etimolóxicu de la Llingua Asturiana' a cargu de Reina Bastardas (Universitat de Barcelona) y Julen Manterola (Euskal Herriko Unibertsitatea).

El miércoles 6, dende les 16 hores van presentase les comunicaciones: 'Lexicalización, gramaticalización y pragmatización na fraseoloxía asturiana' de Llucía Menéndez; 'Primeres aproximaciones sociofonétiques a la prosodia asturiana de Xixón' de Víctor Bargiela; 'L'apaición de Conceyu Bable nel so tiempu y espaciu' de Marcos Rodríguez; 'Les llingües d'Asturies y les otres llingües rexonales españoles: dalgunos datos comparativos' de Francisco J. Llera Ramo; y 'Presentación del Archivu de la Represión Llingüística del asturianu. ARLAS' d'Inaciu Galán. La sesión d'esa tarde va rematar cola presentación de 'La traducción de 'Exercicios d'estilu' de Raymond Queneau' a cargu de Pilar Fidalgo Hevia y Carmen Muñiz Cachón. Amás de la conferencia del académicu de la Llingua, Jose Antonio Fernández Vior: 'Normas ortográficas del eonaviego: valor social y norma lingüística».

La postrera xornada, el xueves 7, va ufrir de les 16 hores pa en delantre les comunicaciones: 'La lliteratura infantil y xuvenil n'asturianu nos caberos 25 años: formatos, temátiques y camín de futuru' de Loreto Díaz y Aida Bárbara Parrales; 'Ente Morgana y Melusina: el mundu féericu en tres relatos populares asturianos' d'Andrés Menéndez; 'La violencia de xéneru nes noveles de Gonzalo G. Barreñada', por Darío de Dios. Y nuna segunda mesa: 'D'oricios a mejillones: pequeñu estudiu sobre'l mariscu na fala del Xixón d'anguañu' de Nel de la Campa; 'Igua del Diccionariu Senabrés', por Xuan Lajo; y 'La toponimia de la mar d'Asturies' de Xuan Pedrayes. La conferencia de pieslle va ponela'l romanista Hugo Carbonelle (Sorbonne Université) abordando 'De la evolucion y el mantenimientu del sufixu protorromanu */-'jon-e/ n'asturianu: enfoque morfolóxicu y diacrónicu'.

• Temas
• Alitar Asturies