La llingua amudecía na escuela

El so director ye autor de la tesis 'La llingua asturiana nel franquismu' (2020) y desplica qu'esti proyectu surde de la necesidá d'afondar nuna de les cuestiones qu'abordaba el so trabayu académicu: «La situación nes escueles, que foi la forma de represión llingüística más evidente que se dio n'Asturies. Entós recoyera diversos testimonios orales y parecíame importante dexar constancia gráfica d'esos rellatos, amosando a persones que pasaron pol sistema educativu franquista a lo llargo de distintes époques pa recoyer y dar a conocer cómo se reprimía l'usu de la nuestra llingua, dalgo que casi tolos asturianos conocen porque en casa siempre se contó, pero d'una manera anecdótica, cuando en realidá yera la norma». Galán matiza que «inda nun yera dalgo organizao d'una manera planificada, na forma na que s'articulaba naquel momentu la enseñanza, el castigu, la violencia física o verbal, acaba llogrando de facto qu'eso se convierta nuna actitú xeneralizada na que se fai de menos a los nenos por ser falantes, reprimiendo-yos l'usu de la llingua y atacando-yos a l'autoestima», apunta.

Nesi sen, el documental allampia por ser útil pa desplicar actitúes que perduren inda con fuercia en dellos sectores de la sociedá: «Munches veces preguntámonos cómo son posible comportamientos de los mesmos asturianos contra l'idioma, incluso acentuáos cuando los caltienen persones falantes. Equí atopamos respuestes pero non toes, porque la estigmatización nun vien namás d'esa dómina, inda nesi tiempu refuérzase pola concepción centralista y uniformadora que caltenía'l réxime y conocer qué paso nesos años, cómo se treslladaron eses actitúes a les families, ayúdanos a entender lo que tovía asocede güei».

Xunta los testimonios qu'apurren nel documental los informantes y especialistes como'l filólogu Ramón d'Andrés, la etnógrafa Irene Díaz, l'hestoriador Rafa Rodríguez Valdés o la expresidenta de l'Academia de la Llingua Ana Cano, Galán válese de la investigación entamada na so tesis. Nella constatara la singularidá del casu asturianu respective a lo ocurrío notros territorios con llingua propia y l'ausencia de disposiciones alministratives especifiques pa prohibir l'usu del idioma: «Lo que sal ye la diferencia respective a eses otres comunidaes y ye que naquelles había un componente políticu asociáu a unes idees nacionalistes qu'equí nun se daba. La posibilidá de que te llamaren mal español por falar asturianu nun tenía sentíu. Nesi sen nun atopamos documentación concreta de prohibiciones, a nun ser nos años 50 cuando'l RIDEA nes bases d'un concursu de cuentos nun s'almite testos n'asturianu. Pero nun hai d'escaecer que la lexislación xeneral sobre llingües tamién taba vixente n'Asturies y eso caltenía un ambiente non favoratible». La mesma inesistencia d'un discursu de reivindicación llingüística n'Asturies anterior a la guerra civil, fuera del que propugnaben figures islaes como Fernán Coronas, Pachín de Melás o Pin de Pría fexo, a xuiciu del director de 'No se dice es, se dice ye', que «la sociedá asturiana nun tuviere ferramientes pa enfrentase a esa represión llingüística con un discursu que defendiese'l dicir: 'Non, yo nun falo mal, falo notra llingua'. Eso nun esistía y l'efectu del sistema educativu franquista equí tradúxose simplemente n'afondar nuna falta d'autoestima pa cola propia llingua», diz Galán.

Los prexuicios semaos na dictadura, caltuviéronse en bona parte del nuevu réxime democráticu, inda les coses escomenzaron a cambiar cola introducción del asturianu na enseñanza y les polítiques normalizadores: «Esa autopercepción meyoró, dícenlo les encuestes y si va 40 años pa gran parte de la sociedá yera falar mal, güei esos datos son mínimos. Inda asina'l fondu del argumentariu que tovía s'usa contra l'asturianu provién d'aquelles dómines. El documental quier valir pa que la xente se reconoza al remembrar esa parte escaecía de la nuestra historia», asegura'l director d'un trabayu que va estrenase bien lluego pa percorrer distintos conceyos enantes d'emitise na televisión autonómica.