«L'asturianada ta n'auxe, hay que siguir tirando por ello»

Dende Nava, el llugar onde reside, el protagonista del tributu almitía a EL COMERCIO la ilusión cola que lu recibía y tamién la so sorpresa. A piques de cumplir los 90 años, Montes daba amuesa de bon humor y humildá: «Yo toi mui agradecidu del público porque fueron unos cuantos los homenaxes, pero con esti ya nun contaba. Pensaba yo que d'esti paisanucu ya nun s'acordaba naide y mire, alguién s'acordó y eso ye siempre d'agradecer». Retiráu va tiempu de les actuaciones, asegura nun les echar en falta cola mesma retranca: «De salú encuéntrome bastante bien y nun tendría ningún mieu de cantar una cola gaita, pero toi mui tranquilu así, llévolo bien. Creo qu'eso estrañaríalo el que cante cuatro o cinco años, pero yo canté cuarenta, ya taba fartu, home, nun quería más paella». Dexa por sentao igualmente el sosiegu col qu'afronta esti tiempu de la so vida: «Soi nacíu en Bimenes, viví en Piloña y agora toi en Nava. Ya nun cambiaré de sitiu porque nun tengo más tiempu y por equí hai maneres de tar mui a gusto».

Na so memoria llúcida, sigue bien vivu el recuerdu al so hermanu, el gaiteru Luis Montes, y a los sos escomienzos como cantador de tonada. «Luis era gaiteru de los buenos, como munchos que había, sabía acompañar y tocar, sí, hom. Tocó la gaita mui pronto, yo yera muncho menor qu'él y arranqué bastante más tarde, además empecé cola canción española. Actué muncho con eso, pero claro, soi asturianu y dixe: 'Coño, voi probar cola canción asturiana'. La verdá ye que tuve suerte, porque nun too ye valir, algunes veces si nun t'acompaña la suerte por buenu que seas nun vas arriba. Y empecé por ahí y fui campeón d'Asturies», relata. En cuantes a les sos referencies poles que cantar de la que principió desplica que «yo escuchábalos a toos, pero arranqué en razón de les mios posibilidaes, nun quixe imitar a naide porque nun me parecía conveniente tirar por caminos andaos. Les canciones míes nun son de naide, nun son namás que d'Armando Montes», espresa con arguyu.

Contemporáneu d'una rellumante xeneración de cantadores, heriedes directos de los grandes nomes qu'algamaron l'ésitu enantes de la guerra, tocó-y compartir tables con dalgunos de los más sonaos y tampoco nesti casu quier incurrir na posibilidá de ser inxustu resaltando a unos penriba d'otros. «Escuchélos a toos, a Juanín, al Presi, a Noriega. Nun puedo destacar a ningún porque yeren tan buenos qué cómo los diferencies. De El Presi, fuimos bastante amigos, actuamos munches veces xuntos, recuerdo que la última vez fue en Tiñana y ya andaba l'home... Dicíame: 'Coño, Montes, mira, nun sé lo que seguiremos por ahí'. Y el probe nun duró muncho. Ye que húbolos tan grandes que nun puedes diferencialos porque yeren a cada cual meyor: Celestino Rubiera, Ponteo, qué sió. Y na gaita lo mesmo, tocóme cantar colos meyores: Luis d'Arnizo, el Gaiteru de Veriña, toos. Fue una época mui buena, grabamos muncho porque cuando ganabes un concurso les cases llamábente. Yo quedé campeón d'Asturies nel 71. Grabé munches cintes y tuvi per Venezuela, Puerto Rico, Bélxica cantando pa los emigrantes», evoca. D'esta última esperiencia quedó-y grabao cómo lu recibíen aquellos asturianos: «No ye solo que s'emocionaran ellos, emocionábente a ti cuando tabes cantando y veíes que-yos caíen les lágrimes. Esto nun ye broma, eh, nun ye broma».

De la salú anguaño de l'asturianada tien una visión enfotada: «Agora mesmo ta n'auxe, hai muncha xente moza y mui buenos cantantes. Y tienen una gran preparación. Nosotros nun tuvimos escuela, aprendíes d'oyíu. Estos chavales tan mui preparaos y, si sabes música, ta claro que vas cantar meyor. Hai que siguir tirando por ello siempre, que ye lo nuestro», dexa bien claro.